Xəbər verdiyimiz kimi, dekabrın 14-də Kəlbəcər rayonunun Çıraq kəndi ərazisində 8 nəfər (4 mülki şəxs, 4 hərbçi) minaya düşüb. Nəticədə gizir Zöhrab Hümbətov şəhid olub, digər 7 nəfər isə müxtəlif dərəcəli bədən xəsarətləri alıb.

Qeyd edək ki, müdafiə naziri general-polkovnik Zakir Həsənov Koreya Respublikasının Milli Assambleyasının üzvü Lii Hunseunqun rəhbərlik etdiyi nümayəndə heyəti ilə görüşü zamanı Kəlbəcərdə baş verən hadisənin "erməni hərbi birləşmələri tərəfindən hər hansı hərbi zərurətin olmadığı halda insan tələfatı məqsədilə basdırdığı mina partlayışı" adlandırıb.

Zakir Həsənovun Kəlbəcərdəki hadisəni bu cür təqdim etməsindən çıxış etsək, baş verən bu hadisə ermənilərin təxribat-diversiya qrupunun əməlləri ola bilərmi? Ümumiyyətlə, bu cür təxribatlarda Ermənistanın məqsədi nədir?

Mövzu ilə bağlı Redaktor.az-a danışan hərbi ekspert, polkovnik Üzeyir Cəfərov bildirdi ki, bu sualın çox sadə cavabı var.

Onun sözlərinə görə, düşmənin məqsədi Azərbaycan ordusuna daha çox ziyan vurmaq, şəxsi heyətin itkisinin sayının artırılması, o cümlədən texnikaların sıradan çıxarılmasıdır:

"Bu təxribatın, diversiyanın məqsədi, məramı odur. Digər məqsədləri insanlarda qorxu, xof yaratmaqdır. Bu məqsədlə bu əməllər həyata keçirilir. Kəlbəcər bir güllə atılmadan Azərbaycana qaytarılıb. Hər hansı geniş miqyaslı döyüş olmayıb ki, deyəsən, hansısa bir müdafiə xətti olub və düşmən orada minalar basdırıb. Bu, Ermənistanın iç üzünü göstərir. Ermənistanın apardığı siyasətin tərkib hissəsidir. Ona görə, müdafiə naziri Zakir Həsənov xəbərdarlığını da edir. Amma bizim hərbiçilər də diqqətli, ehtiyatlı olmalıdırlar. Allah şəhidimizə rəhmət etsin. Dünən Tovuzda dəfn olunan gizirimizin 10 il təcrübəsi olub. Və mina partlaşıyı nəticəsində şəhid oldu. 3 hərbi qulluqçumuz yaralandı”.

Hərbi ekspert onu da qeyd etdi ki, bu ərazilər düşmən nəzarətində uzun illər olmuş ərazilərdir.

“Orada o minalar indi də, bundan əvvəl də basdırıla bilər. Amma düşmənin təxribat-diversiya qrupları uzun illər o ərazidə olduqlarına görə yolları bilirlər, maksimum istifadə etməyə çalışırlar və istifadə də edirlər. Onların yeganə məqsədi orada bir ərazini öz nəzarəti altına almaq deyil, nəyəsə nail olmaq deyil. Sadəcə Azərbaycan ordusuna ziyan vurmaqla öz fəaliyyətlərini davam etdirirlər. Bu fəaliyyətlər bu şəkildə həyata keçirilir. Yəni bizim əsgər və zabitlərimiz minaya düşür, həyatını itirən şəhid olur, şəhid olmayan bədən üzvlərini itirir. Ermənistandan bundan sonra da xain və namərd əməllərin sayı hələ gözləniləndir. O vaxta qədər ki, onlar tamam ərazilərimizdən çıxarılsın. Amma biz uzun müddət belə faciələrlə rastlaşacayıq”, - deyə Üzeyir Cəfərov bildirdi.

Həmidə İbrahimova