Yanvarın 31-də Xural TV-nin efirində 35 saylı üçüncü seçki dairəsindən deputatlığa namizəd, Ümid Partiyasının rəhbəri İqbal Ağazadə qonaq olub. İ.Ağazadə telejurnalist Əvəz Zeynallının suallarını cavablandırarkən yol verdiyi böyük bir qanun pozuntusunun üstünü açıb. Ə.Zeynallının “seçkidə neçə faiz səs alacaqsız?” sualına cavabda bildirib ki, məntəqə-məntəqə nə qədər səs alacaqlarını bilirlər: “Bilirik ki, nə qədər səs alacağıq. Amma bunu açıqlamaq istəmirəm. Ona uyğun da inzibati resurslar adamlarımızın üzərinə getməsin. Hər məntəqəni bilirik. Ayın 7-də gecə bunu açıqlayacağıq. Seçkidən 2 gün əvvəldən açıqlayacağıq ki, biz bu məntəqədən bu qədər səs alacağıq. Heç düşünməsinlər. Xəbərdarlıq edirəm: bizə səs verəcək adamlar şəxsiyyət vəsiqəsinin nömrəsi, seriyası, verilmə tarixi, ünvanı, imzası ilə “biz bu adama (özünü nəzərdə tutur-musavat.com) səs veririk deyə sənəd imzalayıblar. Sənəd imzalayıblar, hər məntəqə üzrə. Biz bu qədər adam səs verdik. Və 9-da da bunu təsdiq edəcəyik. Səsverməyə gedənə qədər. Özləri imzalayıblar, bina-bina. Orda da qeyd ediblər ki, biz səsimizi İqbal Ağazadəyə veririk. 2015-ci ildəki səsimizə haram qatdıqları kimi bu il 9 fevralda da səsimizə haram qatacaqlarından qorxduğumuz üçün əvvəlcədən bəyan edirik”.
Aparıcının “Azərbaycanda belə şeylər baş verir, insanlar sizə səs verəcəyini bəyan etsə də, seçkidə başqasına səs verə bilər” ehtimalını cavablandıran İ.Ağazadə bildirib: Bizim dairədə bu, mümkün deyil. Çünki dairənin seçiciləri çox obyektivdilər”.
R.Arifoğlunun kampaniya meneceri, seçki texnoloqu Ruslan İbrahimbəyli isə bu açıqlamanın, eləcə də bu açıqlamanın arxasındakı əməllərin ciddi qanun pozuntusu olduğunu bildirdi: “Bizdə əvvəldən məlumat vardı ki, İqbal Ağazadənin qərargah nümayəndələri vətəndaşlardan onların vəsiqələrini yığır. Amma əlimizdə tutarlı sübut olmadığına görə bunu heç zaman işıqlandırmadıq. İndi İqbal Ağazadə Xural TV-də verdiyi müsahibədə bizə çatan məlumatı tam təsdiqlədi. Bu, konstitusiyanın 83-cü maddəsinə, Seçki Məcəlləsinin 2-ci maddəsinə tam zidd olan addımlardır. Hər bir Azərbaycan vətəndaşı gizli, heç kimin təsiri olmadan, öz istəyi ilə səsvermədə hansısa bir namizədin xeyrinə və əleyhinə səs verə bilər. İ.Ağazadənin dediyi artıq seçicilərin səsverməsinə təsirdir. Azərbaycan respublikasında qabaqcadan səs vermə təcrübəsi və ənənəsi yoxdur. İqbal Ağazadə deyə bilərdi ki, tərəfdarları var. Hansısa rəqəm deyə bilərdi. Amma o insanlar mənə səs veriblər, verəcəklər və imzaları ilə təsdiqləyiblər – bu, doğru deyil. Bu qanun pozuntusuna görə İqbal Ağazadənin namizədliyi ləğv oluna bilər”.
R.İbrahimbəyli eyni zamanda dedi ki, İ.Ağazadənin başqa bir namizədin guya soyuducu paylaması ilə bağlı dedikləri də ciddi qanun pozuntusudur: “İnzibati Xətalar Məcəlləsinin 166-cı maddəsində göstərilir ki, seçkinin nəticəsinə təsir göstərmək məqsəilə deputatlığa və ya seçkili orqana (vəzifəyə) namizəd haqqında bilərəkdən yalan məlumatlar dərc etməyə və ya onları başqa üsullarla yaymağa görə yeddi yüz manatdan doqquz yüz manatadək məbləğdə cərimə edilir. Biriinci, bu, qanun pozuntusudur və qanuna uyğun cəzalandırma nəzərdə tutulur. İkincisi, bu, açıq-aydın böhtandır. Sübutları varsa, ortaya qoysunlar. Əks halda bu cür ağır və heç bir əsası olmayan ittihamlara görə qanun qarşısında cavab verməli olacaqlar”.
Mənbə: Musavat.com
