Züleyxa Həbib qızı Seyidməmmədova — Azərbaycan SSR ictimai təminat naziri (1952-1975), ilk azərbaycanlı təyyarəçiqadınlardan biri, II Dünya müharibəsində hərbi təyyarəçi, kapitan.
Azərbaycanın ilk qadın təyyarəçilərindən biri də Züleyxa Seyidməmmədova olmuşdur. O, 22 mart 1919-cu ildə Bakı şəhərində anadan olmuşdur. Atası Mirhəbib ağa dini təhsil almış, həm də dünyəvi ali məktəbdə oxumuşdur. Mühasib olan Mirhəbib ağa məşhur xeyriyyəçi, Bakı milyonçusu Hacı Zeynalabdin Tağıyevin sağ əli sayılırdı. O, Hacının vəsaitini nə qədər və necə xərclədiyini qəpiyinədək hesablayır, hər ayın sonunda Tağıyevə məlumat verirdi. Sovet hökuməti quruldaqdan sonra yeni yaranmış hökumət Mirhəbib ağanın Tatarski (indiki Əlimərdan bəy Topçubaşov) küçəsindəki ikimərtəbəli evini və 1915-ci ildə Şüvəlanda tikdirdiyi bağ evini əlindən alır. Mirhəbib ağa da, ailəsi də həmin bağı çox sevirdilər. Ən çox da körpə övladı, od parçası Züleyxa xanım... Züleyxa xanım oxuduğu 16 saylı məktəbdə dərs əlaçısı idi. Valideynləri onun ali təhsil alıb neft mühəndisi olmasını istəyirdilər.
Züleyxa Həbib qızı 1935-ci ildə Bakı aeroklubunu, 1936-cı ildə Əzizbəyov adına Azərbaycan Sənaye Universitetini, 1941-ci ildə isə N.Y.Jukovski adına Hərbi Hava Akademiyasını bitirmişdir. O, ikinci Dünya müharibəsində qırıcı təyyarəçi və qadınlardan ibarət qırıcı aviasiya polkunun komandir müavini olmuş, 500-dən artıq döyüş uçuşu keçirmişdir. Təyyarəçilər aramsız uçuşlarla düşmənin yerləşdiyi ərazilərdə aerodromları, ordu hissələrini və texnikanı bombalayıb məhv etməklə qələbəni yaxınlaşdırmışlar. Z.H.Seyidməmmədova Böyük Vətən Müharibəsi illərində düşmənin “gecə əcinnələri” adlandırdığı; qırıcı qadın aviapolkunun komandir müavini olmuşdur. İkinci dərəcəli “Böyük Vətən Müharibəsi” ordeni və “Almaniya üzərində qələbəyə görə” medalı ilə təltif edilmişdir. 1952-1975-ci illərdə Azərbaycan SSR-in İctimai təminat naziri olmuşdur.