Əqrəb/Skorpion- İsti ölkələrdə yaşayan, xərçəng və hörümçəyə oxşayan zəhərli canlıdır. Skorpion bir sıra Avropa dillərində demək olar ki, eyni səslənir və mənası “kəsmək” deməkdir. Məsələn, Alman d. “scheren“, İngilis d. “scissor”. Hind Avropa dillərində isə “kora”, yəni qalın dəri sözündən götürüldüyünə inanılır. Skorpion Qədim Misirdə Serk adlanırdı. Serket isə başında əqrəb təsviri və bədəni əqrəb formada olan tanrıçadır, Ra tanrısının qızıdır. “Serket hetyt” onun tam adıdır və mənası “nəfəs almağa məcbur edən” deməkdir. Əqrəb insanı sancdıqda nəfəs yollarında spazm yaranır və ölüm də əsasən bu səbəbdən olur. Serxet tanrıça isə insanı nəfəs aldırır və ölməyə qoymur, həm də əqrəb sancmalarından qoruyur. Serxet özü bir kult idi, sonradan isə Qor tanrısı kultlarına daxil oldu. Set ilə müharibədə Serxet və əqrəblər həm İsidanı, həm də deltada yaralanmış Qoru qoruyurdular. Yəni saysız hesabsız əqrəblər həmin ərazini əhatəyə alaraq; bir sərhəd yaratmışdılar ki, İsida ilə Qora heç kim yaxın düşə bilməsin. Bəlkə dilimizdə olan “Sərhəd ” sözü elə Serxet tanrıçanın yadigarıdır? Bəzi mənbələrə görə isə İsidanı yeddi əqrəb qoruyurdu. Serxet eyni zamanda Ana tanrıça idi. İlan tanrı Nexebkaunun anası hesab edilir. Neftida ilə Serxet Qoru doğmaq üçün İsidaya yardım etmişdilər. Səhrada müxtəlif rəngli, çalarlı əqrəblər olsa da, onların içərisində daha zəhərli olan “Ağ Əqrəb” idi. Həm də ümumiyyətlə əqrəblərin qanı ağ rəngli olur. Əqrəblər iki gün su altında havasız, üç il ac, 24 saat dondurucuda sağ qalır, radiasiyaya dözümlüdür. Əqrəb zəhərindən antinuklear zərdab hazırlanır. Qədim Misirdə firon sərdabələrində ağ əqrəblərin obrazına tez –tez rast gəlinir. Lerner Hidrası ilə döyüşən Heraklı öldürmək üçün sudan nəhəng, ən zəhərli əqrəb çıxaraq onu öldürmək istəyir. Vaxtilə Heraklı itələyən Hera tanrıçası həmin əqrəbi göylərə qaldırıb ulduza çevirir və Heraklı ölümdən qurtarır. Bu gün də astrologiyada əqrəb bürcü var. Əqrəblərə Orta Asiyada, Krımda, Qafqazda, Avropanın cənubunda və s. ölkələrdə rast gəlinir. Bəlkə elə “Ağ/Aq Rəbblər”, “Aq/Ağ Tanrılar”Ağ Əqrəb kultu ilə bağlıdır? Çünki yaradan da odur, öldürən də odur! Bu gün tibbdə öldürücü ilan, əqrəb, arı zəhərləri həm də şəfaverici vasitələrdir. Şair Nəcip Fazil yazır: ”Sen ve ben, gözyaşıyla ıslanmış hamurdanız;
Rengimize baksınlar, kandan ve çamurdanız!
Akrebin kıskacında yoğurmuş bizi kader;
Aldırma, böyle gelmiş, bu dünya böyle gider”!
“Hor sivilizasiyası və onun günümüzdə izləri” kitabından. F. Rüstəmova