Ermənistan silahlı qüvvələrinin dövlət sərhəddinin Qazax istiqamətində atəşkəsi mütəmadi pozması əsasən onların Qərb sərhəddində bizə yeni problem açmasından irəli gəlir.

Politoloq Məhəmməd Əsədullazadə Redaktor.az-a açıqlamasında son iki gün ərzində Ermənistan-Azərbaycan sərhədində erməni snayperlərin aktivləşməsinin səbəblərinə aydınlıq gətirib.

Politoloq hesab edir ki, ermənilər bununla sərhəd qoşunlarının döyüş vəziyyətini yoxlayır:

“Bundan əlavə, Qarabağ cəbhəsindən diqqəti ayırıb, prosesləri KTMT çərçivəsinə qaldırmaq istəyirlər. Çünki Rusiya rəhbərliyi KTMT nizamnaməsində dəyişikliklər edib təşkilatda müşahidəçi statusu təsis edir. İrəvanda hesab edirlər ki, bu dəyişiklilərin məqsədi Azərbaycanı təşkilata cəlb etməkdir. Ermənistan dövlət sərhəddində təxribat edərək Azərbaycanı provakasiyaya çəkmək və rəsmi Bakının mümkün namizədlik məsələsinə kəskin etiraz etməyi planlayır”.

M. Əsədullazadə vurğulayıb ki, Ermənistan rəhbərliyi sərhəddə mümkün qədər vəziyyəti gərginləşdirməyə çalışır:

“Nikol Paşinyan problemi digər müstəviyə çəkmək niyyətindədir. Biz Ermənistanın rəhbərliyinin bu kimi provakasiyaırının davam edəcəyini gözləməliyik. Onlar Qarabağ cəbhəsində böyük miqyasda təxribatdan çəkinirlər. Bilirlər ki, bu baş versə, Azərbaycan irəliləyə bilər. Sərhəddə Azərbaycana qarşı yeni kampaniya başlada bilərlər”.