“Brexit” (Böyük Britaniyanın Avropa İttifaqından ayrılması –red.) müqaviləsinin qəbul edilməməsi çox ciddi nəticələrə səbəb olacaq.

Ailehekimiklinikasi.az publika.az-a istinadən xəbər verir ki, bu haqda Böyük Britaniyanın baş naziri Tereza Mey ötən gün ölkə parlamentində "Brexit" müqaviləsi ilə bağlı keçirilən səsvermənin nəticələrini şərh edərkən deyib.

Baş nazir Böyük Britaniyanın aprelin 12-də hüquqi öhdəlik olaraq Avropa İttifaqından ayrılacağını, lakin müqaviləsiz ayrılmağın qarşısını almaq üçün yetərli vaxtın olmadığını bildirib. Tereza Mey əlavə edib ki, “Brexit” müqaviləsinə kifayət qədər dəstək vermək üçün danışıqları davam etdirəcək.

Qeyd edək ki, Böyük Britaniya parlamenti ötən gün "Brexit" müqaviləsini üçüncü dəfə rədd edib.

“Brexit” martın 29-da tamamlanmalı olsa da, Avropa İttifaqı ilə müqavilə parlamentdə qəbul olunmayıb. Bundan sonra Avropa İttifaqı “Brexit”i şərti olaraq təxirə salmağa razılıq verib. İttifaq liderlərinin zirvə görüşündə qəbul edilən qərara əsasən, əgər Britaniya parlamenti “Brexit” müqaviləsini təsdiqləsə, ölkə qurumu mayın 22-də tərk edəcək. Müqavilə təsdiqlənmədiyi təqdirdə, “Brexit” aprelin 12-dək təxirə salınacaq.

Xatırladaq ki, Britaniya hökuməti Avropa İttifaqını tərk etmə tarixinin iyunun 30-dək uzadılmasını istəmişdi, lakin mayın 23-də Avropa Parlamentinə seçkilər keçirilməsi səbəbindən bu tarix mayın 22-nə təyin olunub.