"Bakıda keçirilmiş görüşlə əlaqədar deyə bilərəm ki, bu məlumatı biz "Times" qəzetindən öyrəndik. Bizim bundan xəbərimiz yox idi və təbii ki, belə mötəbər mətbuat orqanında çıxan məqaləyə biz diqqətlə yanaşaraq araşdırma aparmışıq".

Publika.az İTV-yə istinadla xəbər verir ki, bunu Prezident İlham Əliyev Almaniya Kansleri Fridrix Mertslə birgə mətbuat konfransında Bakıda Almaniya və Rusiya nümayəndələri arasında görüşün keçirilməsi barədə suala cavabında deyib.

"Dünən mən Berlinə gəlməzdən öncə Azərbaycan Dövlət Sərhəd Xidmətindən məlumat istəmişəm ki, "Times" qəzetində adları keçən şəxslər Azərbaycanda bir vaxtda olublar, yoxsa yox. Və onu sizə deyə bilərəm ki, bu məlumat təsdiqləndi.

İyulun 12-də Berlin-Bakı reysi ilə iki nəfər tanınmış şəxs - biri xanım Merkelin administrasiyasının rəhbəri olduğu haqqında məlumat var, cənab Pofalla və cənab Platzek Bakıya gəlmişdilər və iyulun 14-də Bakıdan Berlinə geri qayıtmışdılar. Eyni zamanda Moskvadan Bakıya ayın 12-də Rusiyanın keçmiş baş naziri cənab Zubkov və Rusiya prezidentinin yanında vətəndaş cəmiyyətin şurasının rəhbəri cənab Fadeyev Bakıya gəlmişdilər və biri ayın 13-də, o biri isə ayın 14-də Bakıdan ayrılmışdılar.

Bizə bu barədə nə Almanyadan, nə Rusiyadan hər hansı bir məlumat daxil olmayıb. Yəni bizim ərazimiz bizdən xəbərsiz sadəcə olaraq istifadə olunmuşdur. Və belə bir görüşün olub-olmaması ilə bağlı da mən konkret bir şey deyə bilmərəm, çünki biz bunu görməmişik. Amma dediyim bu uçuş statistikası deməyə əsas verir ki, belə bir gizli görüş Bakıda keçirilmişdir. Əgər bu görüş Ukrayna-Rusiya müharibəsindən sonu olacaqsa, sona gətirəcəksə, əlbəttə ki, biz bunu alqışlayırıq.

O ki qaldı ikinci suala, bilirsiniz, mən o vaxt məsləhət verirəm ki, bu məsləhət məndən xahiş edilir. Mən bu yaxınlarda Qarabağın Şuşa şəhərində Qlobal Media Forumunda oxşar bir sualla üzləşmişdim və demişdim ki, istənilən halda müharibə dərhal dayandırılmalıdır. Bizim əsas məqsədimiz bundan ibarətdir ki, bu müharibə dayansın və bölgədə sülh təmin edilsin", - Azərbaycan lideri bəyan edib.