Finlandiya prezidenti Aleksandr Stubb Avropa İttifaqının (Aİ) üzv sayının 27-dən 40-a çatdırılmasını təklif edib və Kanadanın da birliyə qoşulmasının mümkünlüyündən danışıb.

Publika.az xəbər verir ki, o, bu barədə CNBC telekanalına müsahibəsində bildirib.

“Kanadanın ABŞ-ın 51-ci ştatına çevrilməsi əvəzinə Aİ-nin 28-ci üzvü olması gözəl olmazdımı?” - deyə Stubb qeyd edib.

Finlandiya liderinin fikrincə, Avropa İttifaqı daha geniş düşünməli və beynəlxalq arenada öz mövqeyini gücləndirməlidir.

O, Aİ-yə potensial namizədlər sırasında Türkiyə, keçmiş Yuqoslaviya ölkələri, Albaniya, Norveç, İslandiya, Ukrayna, Moldova və Gürcüstanın adını çəkib.

Bu arada Almaniya Kansleri Fridrix Merts Ukraynanın yaxın vaxtlarda Avropa İttifaqına qəbul ediləcəyinə inanmadığını bildirib.

Kanslerin sözlərinə görə, Ukraynanın Aİ-yə üzvlük perspektivinin qorunması vacibdir. O qeyd edib ki, Kiyevlə Avropa İttaqı arasında inteqrasiyanı mərhələli şəkildə dərinləşdirmək mümkündür, lakin sürətli üzvlük hazırkı şəraitdə real görünmür.