Hörmüz boğazı üzərində İranın nəzarəti getdikcə güclənir. Belə ki, Tehran hərbi yoxlama məntəqələri yaradaraq, gəmilərin yoxlanmasını həyata keçirərək və xüsusi diplomatik prosedurlar tətbiq edərək boğazda faktiki nəzarəti möhkəmləndirib. Bundan əlavə, bəzi hallarda sərbəst keçid üçün təhlükəsizlik haqqı da tələb olunur.

Globalinfo.az xəbər verir ki, bu barədə “Reuters” Asiya və Avropadakı gəmiçilik şirkətlərinin nümayəndələrinə, eləcə də İran və İraq rəsmilərinə istinadən məlumat yayıb.

Məlumata görə, İslam İnqilabı Keşikçiləri Korpusu yeni tranzit sistemində əsas rol oynayır. Bu sistemdə Çin və Rusiya ilə əlaqələri olan gəmilərə üstünlük verilir. Digər ölkələrə məxsus gəmilər üçün isə hökumətlərarası razılaşmalar və ya əlavə ödənişlər tələb oluna bilər.

İki Avropa gəmiçilik şirkətinin nümayəndəsinin sözlərinə görə, bəzi gəmilər Hörmüz boğazından təhlükəsiz keçidi təmin etmək məqsədilə İran tərəfinə 150 min dollardan artıq vəsait ödəyir.

İranlı yüksək vəzifəli rəsmilər isə bildiriblər ki, müəyyən hallarda gəmilərdən təhlükəsizlik və naviqasiya haqları alınır və bu məbləğ daşınan yükün növündən asılı olaraq dəyişir. Onların sözlərinə görə, tətbiq olunan ödənişlər bütün ölkələrə şamil edilmir.