Son günlər Rusiya Prezidenti Vladimir Putinin yaxın çevrəsində narazılıqların artdığına dair məlumatlar yayılır. İddialara görə, Kremldə gərginlik pik həddə çatıb.

Ukrayna müharibəsindəki uğursuzluqlar, Moskva da daxil olmaqla digər şəhərlərin intensiv pilotsuz uçuş aparatı hücumlarına məruz qalması, eləcə də Rusiyanın iqtisadi çətinliklərlə üzləşməsi hakimiyyətin yuxarı eşelonlarında və generalitet arasında mərkəzdənqaçma meyillərini, həmçinin Putin əleyhinə əhval-ruhiyyəni gücləndirib. Proseslərin Putinin hakimiyyətdən getməsi ilə nəticələnə biləcəyi ilə bağlı proqnozlar da səsləndirilir. Üstəlik, 9 May paradının sönük keçməsi və nümayiş etdirilən hərbi texnikanın sayının azlığı bu iddiaları daha da gücləndirib.

Globalinfo.az-a danışan politoloq Murad Sadəddinov bildirib ki, Rusiyanın Ukraynada strateji məqsədlərinə nail ola bilməyəcəyi bəlli idi:

“Hələ müharibənin ilk günlərindən qeyd edirdim ki, Rusiya Ukraynada istədiyi nəticəni əldə edə bilməyəcək, əksinə, özü ağır vəziyyətə düşəcək. Bu gün artıq Rusiyanın öz sərhədlərinin təhlükəsizliyi belə sual altındadır.

Mən bu fikirləri o vaxt səsləndirirdim ki, bir çoxları Rusiyanın Ukrayna üzərində qısa müddətdə qələbə qazanacağını düşünürdü. İlk baxışda tərəflərin resursları arasında ciddi qeyri-bərabərlik var idi. Lakin Ukrayna maliyyə, texnologiya və silah-sursat baxımından Qərbdən geniş dəstək aldı.

Zaman keçdikcə Ukrayna öz hərbi-sənaye kompleksini gücləndirdi və uzaqmənzilli silahlarla Rusiyanın əsas iqtisadi dayaqları olan neft-qaz infrastrukturu və digər strateji obyektlərinə zərbələr endirməyə başladı. Eyni zamanda, Rusiyaya qarşı tətbiq edilən sanksiyalar da tədricən öz təsirini göstərdi”.

Politoloq bildirib ki, hazırda Rusiya iqtisadiyyatında, maliyyə sistemində və xarici ticarətində ciddi itkilər müşahidə olunur:

“Ukraynanın pilotsuz uçuş aparatları Rusiyanın dərinliklərinə qədər daxil olaraq neft, enerji və hərbi-sənaye müəssisələrinə zərbələr endirir. Bu isə öz növbəsində qiymət artımına və əhali arasında narazılığın güclənməsinə səbəb olur.

Rusiya hakimiyyəti təhlükəsizlik məqsədilə internetlə bağlı məhdudiyyətlər tətbiq edir ki, bu da iqtisadi fəaliyyətə mənfi təsir göstərir. Müasir dövrdə internet olmadan normal iqtisadi və biznes fəaliyyəti aparmaq olduqca çətindir.

Rəsmi Moskvanın ritorikasından fərqli olaraq, reallıq tamamilə başqa mənzərə ortaya qoyur. Rusiya cəmiyyəti də artıq bunu görür, anlayır və narazılığını daha açıq şəkildə ifadə edir. Hesab edirəm ki, qarşıdakı dövrdə vəziyyət Rusiyanın özü üçün daha da mürəkkəbləşəcək”.