Rusiya Prezidenti Vladimir Putinin son açıqlaması diqqət çəkir. Belə ki, Putin müharibənin nəticəsi olaraq uzunmüddətli sülhün təmin olunmasının vacibliyini vurğulayıb. O, həmçinin Ukraynadakı rusdilli əhalinin maraqlarının qorunmasının lazım olduğunu bildirib və Ukraynada yaşayan insanların rus dilini ana dili hesab etdiklərini, həmçinin Rusiyanı öz vətənləri olaraq gördüklərini qeyd edib.

Bu mesaj, xüsusilə münaqişənin müsbət həlli istiqamətində ciddi müzakirələrə səbəb olub.

Putinin səsləndirdiyi ifadələr nəyə hesablanıb?

Globalinfo.az-a danışan siyasi şərhçi Əli Mustafayev bildirib ki, Rusiya Prezidenti Vladimir Putin, Ukraynadakı rusdilli əhalinin hüquqlarını müdafiə etməyi əsas gətirərək uzunmüddətli sülhün təmin olunması üçün yeni addımlar atmağa çalışdığını göstərir:

“Ukraynada yaşayan rusdilli əhalinin maraqlarını irəli sürmək yalnız müharibəni uzatmaq məqsədi güdən bir bəhanədir.

Ukraynada çoxsaylı rusdilli insanlar var, amma bu, Ukraynanın daxili məsələsidir. Hər bir ölkənin öz əhalisinin dil və mədəniyyətini sərbəst şəkildə inkişaf etdirmək haqqı var. Rusiya, sadəcə olaraq, Ukraynanın daxili işlərinə müdaxilə edərək bu münaqişəni davam etdirmək və genişləndirmək üçün bir bəhanə tapmağa çalışır”.

Siyasi şərhçi, Putinin bu yanaşmasının, əslində, Ukraynanı Rusiyanın bir hissəsinə çevirmək cəhdi olduğunu bildirib:

“Putin, Ukraynanı öz nəzarətində olan bir əraziyə çevirməyə cəhd edir. Bu, birbaşa Rusiyanın siyasi maraqları ilə bağlıdır və heç bir hüquqi əsas və ya ədalətli səbəbə dayanmır. Rusiyanın iddiaları nə Ukraynanın suverenliyini, nə də beynəlxalq hüququn prinsiplərini qoruyur.

Putinin sülh prosesini uzatmaq üçün həyata keçirdiyi siyasət heç bir müsbət nəticə verməyəcək. Müharibəni daha da uzatmağa yönəlmiş bu cür addımların məqsədi yalnız daha çox ziyan və dağıntı yaratmaqdır. Sülhə gedən yolda bu cür bəhanələr müsbət heç bir yerə aparmır”.