ABŞ-ın İranla müharibədən əvvəl hərbi sursat ehtiyatlarının yetərli olmadığı ortaya çıxıb.

Globalinfo.az xəbər verir ki, bu barədə “New York Times” (NYT) nəşri məlumat yayıb.

Bildirilir ki, ABŞ qüvvələri İranla münaqişə zamanı çox böyük həcmdə müasir döyüş sursatlarından istifadə edib və bu da ehtiyatların ciddi şəkildə azalmasına səbəb olub.

Sözügedən vəziyyət ölkənin döyüş hazırlığı ilə bağlı narahatlıqları artırıb:

“Fevralın sonundan etibarən ABŞ hərbçiləri təxminən 1100 ədəd “JASSM-ER” qanadlı raketindən istifadə edib. Hər bir raketin dəyəri təxminən 1,1 milyon dollar təşkil edir və nəticədə yalnız 1500 ədəd ehtiyatda qalıb.

Bundan əlavə, 1000-dən çox “Tomahawk” raketi, 1200-dən artıq “Patriot” raket müdafiə sistemi üçün interceptor raketləri (hər biri 4 milyon dollardan baha), eləcə də 1000-dən çox “ATACMS” və “Precision Strike” raketi istifadə edilib”.

Bildirilir ki, yalnız ilk iki gün ərzində təxminən 5,6 milyard dollar dəyərində hərbi sursat sərf olunub:

“Əməliyyatları davam etdirmək üçün Pentaqon Avropa və Asiyadakı bəzi silah və sistemləri başqa istiqamətlərə yönləndirib. Bu isə xüsusilə NATO-nun şərq cinahında hazırlığın zəifləməsinə və pilotsuz sistemlərin istifadəsində məhdudiyyətlərə səbəb olub.

Asiya regionunda isə daha ciddi təsirlər müşahidə olunur: Cənubi Koreya kimi strateji bölgələrdən “Patriot” və “THAAD” sistemləri çıxarılıb, dəniz qüvvələrinin bölüşdürülməsi isə regional çəkindirmə imkanlarını zəiflədib”.