ABŞ prezidenti Donald Trampın Ukrayna münaqişəsinin həlli ilə bağlı müzakirələrə qayıdışı iki əsas hadisədən asılıdır.

Publika.az xəbər verir ki, bu barədə politoloq İvan Mezyuho “Lenta.ru”ya açıqlamasında bildirib.

Onun sözlərinə görə, hazırda Trampın diqqəti Ukraynadan daha çox digər məsələlərə yönəlib.

Politoloq qeyd edib ki, birinci səbəb ABŞ-ın İranla bağlı hərbi kampaniyasıdır: “Tramp bu prosesdə faktiki olaraq ilişib qalıb. Onun planları reallaşmadı, İranda ayətullah rejimi mövqelərini qoruyub saxladı. ABŞ-ın hərbi gücü İslam İnqilabı Keşikçiləri Korpusu və İran cəmiyyətinin əhəmiyyətli hissəsi tərəfindən ciddi müqavimətlə qarşılandı”.

Ekspert ikinci mühüm amil kimi 3 noyabr 2026-cı ildə keçiriləcək ABŞ Konqresinə aralıq seçkiləri göstərib. Onun fikrincə, seçkiyə yaxın dövrdə Tramp Ukrayna mövzusuna yenidən qayıda və diplomatik fəallığını artıra bilər.

Bununla belə, Mezyuho hesab edir ki, Tramp əvvəlki kimi konkret vaxt çərçivələri qoymayacaq: “Onun münaqişənin başa çatması ilə bağlı əvvəlki vədləri kağız üzərində qaldığı üçün artıq ciddi qəbul edilmir”.

Politoloq əlavə edib ki, Tramp seçki kampaniyasında “Ukrayna kartı”ndan istifadə edə bilər. Hətta o, Kiyevə hərbi yardımı azaltmaqla özünün MAGA elektoratına əvvəlki vədlərinə qayıtdığı barədə siqnal verə bilər.

Mezyuho Trampın ikinci prezidentlik dövrünü də sərt tənqid edib: “Seçki kampaniyası zamanı o, özünü sülh tərəfdarı kimi təqdim edirdi. Amma reallıqda o, müharibələri bitirən deyil, əksinə, onları genişləndirən hərbi liderə çevrilib”.

Ekspertin qənaətinə görə, ABŞ prezidentinin eyni vaxtda həm İran, həm də Ukrayna münaqişəsini həll etməsi real görünmür.