ABŞ büdcəsində 2027-ci il üçün Ukraynaya yardımın nəzərdə tutulmadığı açıqlanıb. Müdafiə nazirinin maliyyə məsələləri üzrə müavini vəzifəsini icra edən Culs Hyörst Konqresdə keçirilən dinləmələrdə bu məlumatı təsdiqləyib.

Bu qərarın ABŞ Prezidenti Donald Trampın Rusiya Prezidenti ilə telefon danışığından sonra açıqlanması diqqət çəkir.

Vaşinqtonun qərarı Ukraynanın müharibədəki vəziyyətinə necə təsir edəcək?

Globalinfo.az-a danışan politoloq Ramiyə Məmmədova bildirib ki, ABŞ və Prezident Donald Tramp üçün bu müharibə artıq əvvəlki qədər maraq kəsb etmir:

“ABŞ bu müharibədə istədiyi nəticəni əldə etmədi. Donald Tramp da müharibənin dayandırılması istiqamətində gözlənilən qədər effektiv addımlar ata bilmədi. Eyni zamanda, ABŞ-İsrail birliyi ilə İran arasında yaranan gərginlik diqqəti daha çox öz üzərinə çəkdi və bu da Rusiya-Ukrayna müharibəsini müəyyən mənada ikinci plana keçirdi.

Ukraynaya yardımların taleyi həm Avropada, həm də ABŞ-da müzakirə mövzusuna çevrilib. Ümumilikdə, yardımların tədricən azalması ehtimalı artır. Doğrudur, müharibə müəyyən mənada ABŞ üçün iqtisadi gəlirlər də yaradıb, lakin Yaxın Şərqdə artan gərginlik Amerika iqtisadiyyatına əlavə yük gətirir. Bu səbəbdən də yardımların azaldılması gündəmdədir.

Söhbət yalnız maliyyə deyil, həm də hərbi dəstəkdən gedir. Kiyevə edilən yardımların gözlənilən nəticəni vermədiyi qeyd olunur. Donald Tramp müharibənin gedişatından narazıdır. Döyüşlər davam edir, danışıqlar isə uğursuzluqla nəticələnir. İstanbulda keçirilən danışıqlar müəyyən ümidlər yaratsa da, ciddi nəticə vermədi.

Həmçinin Rusiya tərəfinin ABŞ-a açıq şəkildə, “yardımlar dayandırılmasa, müharibə bitməyəcək”, – mesajını verdiyi də bildirilir.

Mövcud vəziyyətdə Ukraynanın müəyyən mənada qurban verilməsi ehtimalı ilə bağlı fikirlər də səslənir. Kiyevin son dövrlərdəki daha yumşaq reaksiyaları da bu ehtimalları gücləndirir”.