Ermənistanda seçki yaxınlaşdıqca ölkədə ikiqütblülük də artmaqdadır. Hakimiyyət yönümlü qüvvələr Qərbin, müxalif yönümlülər isə Rusiyanın maraqlarından çıxış edir. Hökumətin də Kremlin Ermənistan daxilindəki proseslərə müdaxiləsinin qarşısını almaq üçün müvafiq tədbirlər gördüyünə dair iddialar yayılır.

Ermənistanda seçki ərəfəsində müşahidə olunan ikiqütblülüyün əsas səbəbləri nələrdir? Rusiyaya qarşı görüldüyü iddia edilən tədbirlər konkret olaraq hansı sahələrdə özünü göstərə bilər?

Globalinfo.az-a danışan politoloq Məhəmməd Əsədullazadə deyib ki, Ermənistanda seçkilər yaxınlaşdıqca siyasi meydanda mübarizə daha kəskin hal alır:

“Bu gün Ermənistanda iki qütb var. Biri Moskvanın seçkilərə hazırladığı revanşist qüvvələrdir. Kreml onların əli ilə baş nazir Nikol Paşinyanın məğlubiyyətinə nail olmağa çalışır. Pasinyan da paralel olaraq müxalifətə qarşı mövqeyini gücləndirir. O, Rusiyaya qarşı açıq şəkildə addımlar atmır. Ermənistan qanunlarına uyğun hərəkət edir. Hətta Rusiya Prezidenti Vladimir Putinlə son görüşündə də mövqeyini bildirdi.

Moskvanın dəstəklədiyi namizədlərdən Samvel Karapetyanın Güclü Ermənistan Partiyası, keçmiş prezident Robert Köçəryanın Hayastan bloku və Qagik Sarukayanın Çiçəklənən Ermənistan Partiyası üçlü şəkildə hakim partiyanın elektradinı parçalamağa çalışırlar. Rusiya yalnız siyasi və iqtisadi cəhətdən təzyiqlər göstərəcək. Xüsusilə enerji sahəsində və siyasi müstəvidə partiyalarla bunu edəcək.