BMT-nin Beynəlxalq Miqrasiya Təşkilatının məlumatına görə, 2025-ci ildə qeyri-qanuni miqrasiya zamanı təxminən 8000 insan ölüb və ya itkin düşüb.

Teleqraf xəbər verir ki, Beynəlxalq Miqrasiya Təşkilatının saytında dərc olunmuş hesabatda deyilir: "Keçən il dünyada miqrasiya yollarında 7904 nəfər ölüb və ya itkin düşüb. Bu, 2024-cü ildəki (9200) göstəricidən az olsa da, son on il ərzində ən yüksək göstəricilərdən biri olaraq qalır".

Beynəlxalq Miqrasiya Təşkilatının məlumatına görə, sənədsiz miqrantların böyük əksəriyyəti dəniz yolu ilə istədikləri sahillərə çatmağa çalışarkən ölür. Ən ölümcül yol Liviya və Tunisdən Aralıq dənizi vasitəsilə İtaliyaya qədər uzanan marşrutdur. Keçən il 2100 miqrant bu dəniz yolunu keçərkən həlak olub.
İkinci yerdə Atlantik yolu - Qərbi Afrikadan İspaniyanın Kanar adalarına qədər olan marşrut gəlir. 2025-ci ildə bu marşrutda ölən və itkin düşənlərin sayı təxminən 1000 nəfər olub.

Üçüncü ən təhlükəli yol Afrika Buynuzundan Bab əl-Məndəb boğazından keçərək Yəmən və Səudiyyə Ərəbistanına qədər uzanan marşrutdur. Bu yolda ölən və itkin düşənlərin sayı 992 nəfərdir.

2025-ci ildə Afrikadan digər qitələrə keçməyə çalışarkən ümumilikdə 4767 qanunsuz miqrant ölüb və ya itkin düşüb.