Azərbaycan Ermənistandan ilk dəfə 960 ABŞ dolları dəyərində mal idxal edib. Hazırkı mərhələdə bunu “test xarakterli iqtisadi təmas” kimi dəyərləndirmək olar. Yəni tərəflər bir növ bu cür əlaqələrin praktik olaraq necə işlədiyini, həmçinin risklər və imkanları yoxlayır.

Müqayisə üçün deyim ki, bu ilin I rübündə Azərbaycandan Ermənistana 5 milyon 757 min ABŞ dolları dəyərində məhsul ixrac edilib. Ermənistana ixracdan əldə olunan gəlirlər Azərbaycanın ümumi ixrac gəlirlərinin 0,1%-ni təşkil edib.

Tərəflər arasında tam qapalı olan iqtisadi kanalların müəyyən səviyyədə açılmağa başladığı görünür. Əslində, uzun illər davam edən siyasi və hərbi gərginlik fonunda ticarətin birdən-birə bərpa edilməsini də gözləmək düzgün deyil. Lakin diplomatik siyasi təmasların qurulması, danışıqlar prosesinin davam etməsi ilə paralel olaraq iqtisadi və ticarət əlaqələrinin “test xarakterli” olsa belə, qurulması müsbət hadisədir.

Əgər bu ticarət siyasi proseslərlə paralel şəkildə davamlı xarakter alarsa, gələcəkdə iqtisadi münasibətlər daha geniş miqyas ala bilər. Çünki coğrafi yaxınlıq, logistika baxımından imkanlar və regional bazarların inteqrasiyası potensial olaraq hər iki tərəf üçün iqtisadi fayda yaradar.

Ermənistanda iyun ayında baş tutacaq parlament seçkiləri yaxınlaşır və bu, münasibətlərin, habelə sülhün gələcəyi baxımından həlledici mühüm siyasi proses ola bilər.