2016-cı il 1-5 aprel tarixlərində Azərbaycan Silahlı Qüvvələri ilə Ermənistan ordusu arasında yaşanan hərbi toqquşmadan 10 il ötür.

Aprel döyüşləri kimi yadda qalan bu müharibə 1994-cü ildə atəşkəs sazişinin imzalanmasından sonra baş vermiş ən şiddətli hərbi qarşıdurma hesab olunur. Döyüşlər Azərbaycan ordusunun qələbəsi ilə nəticələndi: Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi, Cocuq Mərcanlı, Goranboy rayonunun Gülüstan kəndi, Tərtər rayonunun Qazaxlar kəndi və Suqovuşan kəndi istiqamətində strateji ərazilər düşməndən azad olundu.

Globalinfo.az-a danışan analitik Elnur Ənvəroğlu bildirib ki, bu döyüşlər Azərbaycan tarixində “Dördgünlük müharibə” kimi tanınan mühüm hadisədir, Ermənistan–Azərbaycan münaqişəsinin gedişində dönüş nöqtələrindən biri hesab olunur:

“Bu hadisələr həm hərbi, həm də siyasi baxımdan sonrakı proseslərə ciddi təsir göstərdi. Aprel döyüşləri bir neçə mühüm məqamı ortaya qoydu.

Azərbaycan Ordusunun yüksək döyüş qabiliyyətinə malik olduğu sübut edildi. Eyni zamanda Ermənistanın “keçilməz müdafiə xətti” mifi darmadağın oldu. Belə ki, Ermənistan əvvəllər “keçilməz” olaraq adlandırdığı Ohanyan səddi vasitəsilə işğal etdiyi Qarabağı əlçatmaz kimi göstərməyə çalışırdı. Bundan əlavə, cəbhədə status-kvonun dəyişməz olmadığı Azərbaycan ordusunun şücaəti nəticəsində bir daha təsdiqləndi. Qısası, bu döyüşlər göstərdi ki, Azərbaycan işğalla barışmaq niyyətində deyil və lazım gəldikdə hərbi yolla ərazi bütövlüyünü bərpa etməyə qadirdir.

Aprel döyüşlərinin siyasi və psixoloji təsirləri də əhəmiyyətlidir. Hadisələr Azərbaycan cəmiyyətində böyük ruh yüksəkliyi yaratdı. Uzun illər davam edən danışıqların nəticəsiz qalması fonunda bu qələbə xalqın işğala son qoymaq inamını daha da artırdı. Beynəlxalq səviyyədə isə münaqişənin “dondurulmuş” olmadığı bir daha gündəmə gətirildi. Bu hadisələrdən sonra vasitəçilər, xüsusilə ATƏT-in Minsk qrupu, regionda vəziyyətin nə qədər həssas olduğunu daha açıq şəkildə müşahidə etdilər.

Cəmi dörd gün davam edən müharibə Azərbaycan tarixində böyük iz qoydu. Mən buna 4+4=44 deyərdim, çünki bu şanlı dördlük sonradan 44 günlük Vətən müharibəsi nəticəsində xalqımıza unudulmaz qələbə yaşatdı. Buna görə də 2016-cı ilin aprel döyüşləri, əslində 2020-ci ildə baş verən 44 günlük Vətən müharibəsinin bir növ başlanğıcı və hərbi-siyasi hazırlıq mərhələsi kimi qiymətləndirilə bilər.

Ermənistan tərəfinin artan təxribatçılığı, keçmiş təmas xəttində Azərbaycan ordusu mövqelərinə qarşı intensiv atəş və hücumlar prosesləri sürətləndirirdi, nəticə olaraq Azərbaycan ordusu buna qarşı qabaqlayıcı tədbirlər görürdü. Ordumuz taktiki üstünlüklərini sınadı, yeni silah və texnologiyaların effektivliyini qiymətləndirdi və komanda idarəetmə sisteminin nə qədər təkmil olduğunu təsdiqlədi.

Buna görə də deyə bilərik ki, Aprel döyüşləri yalnız lokal hərbi uğur deyildi. Bu hadisə Azərbaycanın hərbi gücünün, siyasi iradəsinin və xalq–ordu birliyinin bariz nümunəsi kimi yadda qaldı”.