Çinin xarici işlər naziri Van İ və Pakistanın baş nazir müavini və xarici işlər naziri Məhəmməd İshaq Dar görüş keçirib.

Globalinfo.az xəbər verir ki, onlar regiondakı vəziyyəti müzakirə edib və gərginliyin azaldılması üçün birgə strategiya üzərində fikir mübadiləsi aparıblar.

Xarici KİV-lərin məlumatına görə, görüş Pakistanın son həftələrdə İranla bağlı münaqişədə vasitəçi kimi çıxış etməyə çalışdığı bir vaxta təsadüf edir. Belə ki, İslamabad ötən həftə Türkiyə, Misir və Səudiyyə Ərəbistanı ilə danışıqlar aparıb, həmçinin İran və ABŞ arasında dolayı təmaslara dəstək verib.

Görüşdən sonra yayılan birgə bəyanatda Çin və Pakistan tərəfləri dərhal atəşkəsin elan olunmasına çağırıb, eskalasiyanın qarşısını almaq üçün maksimum səylərin göstərilməsinin vacibliyini vurğulayıblar. Bildirilib ki, humanitar yardım münaqişədən zərər çəkən bütün ərazilərə maneəsiz şəkildə çatdırılmalıdır.

Tərəflər, həmçinin, münaqişənin həlli üçün mümkün qədər tez sülh danışıqlarına başlanmasının vacibliyini qeyd edərək, dialoq və diplomatiyanın yeganə effektiv çıxış yolu olduğunu bildiriblər. Eyni zamanda İranın və onun ərəb qonşularının suverenliyi, ərazi bütövlüyü və təhlükəsizliyinə hörmətin önəmi qeyd olunub.

Çin və Pakistan Hörmüz boğazının qlobal ticarət və enerji daşımaları üçün həyati əhəmiyyət daşıdığını xatırladaraq, bölgədə gəmiçilik təhlükəsizliyinin təmin olunmasına çağırıblar. Onlar mülki və kommersiya gəmilərinin təhlükəsiz hərəkətinin təmin edilməsini və tranzitin tezliklə bərpa olunmasını vacib hesab ediblər.