Dini baxımdan faizin haram olduğu vurğulanır. Lakin bir çox insanlar kirayədən azad olmaq üçün evi, pul qazanmaq üçün isə maşını kreditlə əldə etməyə məcbur olur. Digərləri isə telefon və digər texnikanı kreditlə alır.

Faiz haramdırsa, bəs kredit götürmək necə izah olunur?

Kimlər faiz və ya kredit götürə bilər və bu zaman nələrə diqqət etmək lazımdır? Ümumiyyətlə, faiz və kredit məsələlərində dinimizin icazə verdiyi sərhədlər hansılardır?

Globalinfo.az-a danışan Qafqaz Müsəlmanları İdarəsi Qazılar Şurasının üzvü, ilahiyyatçı Rüfət Qarayev bildirib ki, islam dininə görə sələmçilik bir mənalı olaraq hamdır.

Onun sözlərinə görə, kiməsə əllə pul verib onun üzərində də müəyyən faiz alınarsa, bu, artıq haram hesab olunur:

“Amma istisna hallar var. Məsələn, bir insanın evi yoxdursa və kirayə evdə yaşayırsa bu zaman ipoteka yolu ilə, yaxud da hər hansısa yolla ev almağı zəruri hal hesab olunur. Yaxşı olar ki, yaxın dostlar və qohumlar həmin şəxsə borc kimi köməklik edə və o şəxs də heç bankdan da pul götürməyə məcbur qalmaya. Lakin köməklik edən yoxdursa, belə olan təqdirdə bu, istisna hal sayılır. Maşın alıb taksi xidmətiylə məşğul olanları da bu katoqoriyaya daxil etmək mümkündür”.

İlahiyyatçı deyib ki, hər hansısa mağazadan alacağımız məişət texnikaları, işlətdiyimiz telfon və kompyuterlər bunlardan fərqlidir:

“Belə ki, bir malın qiyməti nağd 500 manat təşkil edirsə, altı aylıq hissəli ödənişlə 30 faiz baha qiymətə hesablanaraq 650 manat təşkil edirsə, dini baxımdan bunun heç bir qəbahəti yoxdur”.