“Əl-Cəzirə”nin məlumatına görə, ABŞ və İsrailə məxsus hərbi təyyarələrin İranın Şərqi Azərbaycan əyalətinə endirdiyi zərbələr nəticəsində azı altı nəfər ölüb, doqquz nəfər yaralanıb. Hücumun ölkənin şimal-qərbində, Azərbaycan, Türkiyə və Ermənistanla sərhəd yaxınlığında yerləşən Şahid Mofatteh bölgəsində baş verdiyi bildirilir.

Ekspertlər iddia edirlər ki, zərbələr İran tərəfindən məqsədyönlü şəkildə sızdırılmış kəşfiyyat məlumatları əsasında həyata keçirilə bilər. Bu yolla həm Azərbaycanın, həm də Türkiyənin ABŞ və İsrailə qarşı mövqe sərgiləməsinin hədəfləndiyi ehtimal olunur.

Globalinfo.az-a danışan politoloq Oqtay Qasımov bildirib ki, ABŞ–İsrail–İran qarşıdurması fonunda Azərbaycan əyalətlərinin hədəfə alınması cəmiyyətdə həssaslıqla qarşılanır:

“12 günlük müharibə zamanı Azərbaycan tərəfi açıq şəkildə mövqe ortaya qoymuşdu ki, Güney Azərbaycanın yaşayış məntəqələrinə zərbələr endirilməsin. Bu yanaşma hazırda da davam edir. Lakin münaqişənin miqyası genişlənib və ABŞ artıq prosesin birbaşa tərəfinə çevrilib.

Güney Azərbaycan ərazilərinin yenidən hədəfə alınması həm dövlət, həm də cəmiyyət səviyyəsində narahatlıq doğurur. Nəzərə almaq lazımdır ki, bu ərazilər İran üçün strateji əhəmiyyət daşıyır və orada mühüm hərbi obyektlər yerləşir. Bu baxımdan onların hədəf seçilməsi müəyyən mənada müharibənin məntiqinə uyğun görünür.

Eyni zamanda, İranın bu ərazilərin vurulmasında maraqlı olması ehtimalı da istisna edilmir. Belə bir ssenaridə məqsəd Azərbaycan və Türkiyənin mövqeyinə təsir göstərmək ola bilər. Bununla belə, həm rəsmi Bakı, həm də Ankara prosesi diqqətlə izləyir və münaqişənin sülh yolu ilə həllində maraqlıdır”.