Belə görünür ki, müharibə qısa müddətdə bitməyəcək. Hakimiyyətin yuxarı pilləsində oturan şəxslər və bəzi generallar sıradan çıxarılsa da, onların yerinə yeniləri gəlir və bu yeni qüvvələr də qarşıdurmanı davam etdirir. Xüsusilə yeni hakimiyyətin formalaşması və keçid mərhələsinin özünəməxsusluğu prosesi daha da uzada bilər. İran çoxmillətli ölkədir və bu fonda etnik qarşıdurmaların yaranması ehtimalı da istisna deyil.

Bu sözləri Axar.az-a açıqlamasında politoloq Qabil Hüseynli ABŞ–İran müharibəsinin mümkün nəticələri barədə danışarkən deyib.

Ekspertin fikrincə, İranda daxili proseslər daha təhlükəli mərhələyə keçə bilər:

“Əhalinin bir hissəsi rəhbərliyin sıradan çıxarılmasını müəyyən mənada sevinclə qarşılasa da, bundan sonra hakimiyyətə yeni bir molla, hərbi general və ya şahın oğlunun gətirilməsi cəmiyyətdə yenidən etirazları alovlandıra bilər. Bu isə prosesin daxili vətəndaş müharibəsi mərhələsinə keçməsi riskini artırır.

Əsas strateji məqsəd İranda teokratik idarəetmə modelinə son qoymaqdır. Mollaların siyasi hakimiyyəti artıq ciddi şəkildə zəifləyib. Müharibənin nəticəsi olaraq İranda az da olsa, dünyəvi hakimiyyət modelinin formalaşması mümkündür”.

Qeyd edək ki, İsrail və ABŞ 28 fevraldan İrana qarşı hərbi əməliyyata başlayıb. Endirilən zərbələr nəticəsində İranın ali dini lideri Əli Xamenei başda olmaqla, onlarla yüksək səviyyəli məmur ölüb.