Ermənistanın Baş naziri Nikol Paşinyan ölkəsinin İctimai Televiziyasına müsahibəsində Azərbaycanla sülh prosesindən danışıb. O, hakimiyyətin gündəliyində parlament seçkilərindən əvvəl Azərbaycanla sülh müqaviləsinin imzalanmasının olduğunu bildirib.

Paşinyan sülh sazişinin mətni üzrə müzakirələrin bitdiyini, hazırda yekun müqavilənin imzalanması üçün müvafiq prosesin davam etdiyini söyləyib.

Globalinfo.az-a danışan politoloq Ramiyə Məmmədova deyib ki, indiki məqamda Ermənistanla sülh sazişi Paşinyan üçün daxili sabitlik və prestijin yüksəlməsi mənasına gələcək:

“Sülhün əldə edilməsi ilə o, daxili təzyiqləri azaltmaq istəyir. Çünki bu gün müxalifət həm 44 günlük müharibə, həm də Qarabağın itirilməsi kimi məsələlərlə Paşinyana təzyiq göstərə bilir. Lakin sülhün əldə edilməsi bu təzyiqlərdən azad olmasına imkan yaradır. Təbii ki, eyni zamanda regionda sabitlik istəyən bir Ermənistan obrazı da formalaşır.

Ermənistanda revanşist qruplar qədər sülh tərəfdarı qruplar da mövcuddur və Paşinyan bu qrupun dəstəyini almaq istəyir. Həmçinin o, xarici ölkələrin dəstəyini təmin etməyə çalışır. Çünki sülh, sabit region və sabit Ermənistan deməkdir. Paşinyan bu yolla ölkəsinə investisiyalar cəlb edərək sosial rifahı artırmaq niyyətindədir.

Təbii ki, bütün bunlar qeyri-adi deyil, lakin risklər də mövcuddur. Ehtimal olunan risklərdən biri revanşist qrupların seçkidə qalib gəlməsi və ya Paşinyanın hakimiyyətdən getməsidir. Daha dəqiq desək, əgər bu ssenarilərdən biri baş verərsə və sülh bundan öncə əldə olunarsa, pozula bilər. Halbuki Azərbaycan tərəfi Konstitusiya islahatlarından sonra sülhün yekun sazişin imzalanmasını istəyir və bununla Ermənistanın öz Konstitusiyası ilə sülhdən yayınmasının mümkün olmayacağını düşünür.

Bütün bunları nəzərə alaraq ehtiyatlı olmaq vacibdir. Sülhü arzulasaq da, onun davamlılığı daha məqsədəuyğundur”.

Qeyd edək ki, Ermənistanda parlament seçkiləri 7 iyulda keçiriləcək.