Venesuela prezidenti Nikolas Maduro ABŞ-la narkotik qaçaqmalçılığına qarşı mübarizə məsələsini müzakirə etməyə hazır olduğunu açıqlayıb.

Publika.az TASS-a istinadla xəbər verir ki, Maduro bu sahədə effektiv mübarizənin yalnız faktlara əsaslanan və praqmatik yanaşma ilə mümkün olduğunu bildirib.

Onun sözlərinə görə, Vaşinqton Venesuelanın mövqeyindən xəbərdardır:

“ABŞ hökuməti bunu bilir, çünki biz onların bir çox nümayəndəsinə demişik ki, narkotik qaçaqmalçılığına qarşı mübarizə üzrə razılaşmanı ciddi şəkildə müzakirə etmək istəsələr, biz buna hazırıq”, - deyə Maduro vurğulayıb.

O, eyni zamanda Venesuelanın ABŞ investisiyalarına açıq olduğunu və Amerika bazarının ehtiyacları üçün neft tədarükünü təmin etməyə hazır olduğunu da qeyd edib.

Maduro Vaşinqtonun Karakas ünvanına irəli sürdüyü narkotiklərin istehsalı və yayılmasına qarşı kifayət qədər tədbir görülməməsi ilə bağlı ittihamları əsassız adlandırıb.

Venesuela prezidenti, həmçinin, daha əvvəl ABŞ prezidenti Donald Trampla apardığı danışıqların sayı ilə bağlı açıqlamalar verdiyini xatırladıb və bu mövzuda müxtəlif fərziyyələrin səsləndirildiyini bildirib.