Şimali Kipr Türk Respublikasının yeni prezidenti Tufan Erhürman adanın rum kəsimini əhatə edən Kipr Respublikasının lideri Nikos Hristodulidislə görüşüb. Görüş Birləşmiş Millətlər Təşkilatının (BMT) Cənubi Kiprdəki nümayəndəsinin ofisində baş tutub.

Görüşdə BMT nümayəndəsi Khassim Diagne də iştirak edib. Bu, Tufan Erhürmanın prezident seçildikdən sonra adanın rum hökumətinin rəhbəri ilə ilk görüşüdür. Liderlərin görüşü Kipr adasında vəziyyətin gərginləşməsi fonunda diqqət çəkir.

Globalinfo.az-a danışan siyasi şərhçi Mütəllim Rəhimli deyib ki, Kipr problemi regionda potensial münaqişə ocağına çevrilə bilər:

“Dünyada artan gərginlik və geosiyasi maraqlar uğrunda mübarizə dondurulmuş münaqişələri alovlandırmaqdadır. Bu mənada Kipr adası istisna deyil. Ona görə də, problem mürəkkəbləşmədən və geriyə qayıdış yolları bağlanmadan tərəflərin dialoq qurması təqdirəlayiqdir.

Türk ölkəsinin liderindən heyrətləndirən addım: Müharibə olacaq deyilirdi, lakin...

Şimali Kipr Türk Respublikasının yeni prezidenti Tufan Erhürmanın yunan Kiprinə səfəri cəsarətli addımdır. Bu, nəinki gələcəkdə yaranacaq müharibəni aradan qaldıra, hətta adanın taleyi ilə bağlı ortaq mövqenin formalaşmasına təsir belə göstərə bilər. İki Kipr dövləti arasında münasibətlər sadə deyil, hətta kifayət qədər mürəkkəb və gərgindir. Üstəlik, bu ağır prosesdə Yunanıstan və Türkiyə də iştirakçıya çevrilib və qarşı-qarşıya dayanıb. Uzun illər davam edən mübahisəli vəziyyət tərəflərin geriyə addım atmaq imkanlarını da bloklayıb. Təəsüf ki, müharibə ehtimalı çoxdur. İki Kipr dövlətinin prezidentlərinin görüşü bu ehtimalı da azaltmağa xidmət edir.

Ən mühüm nüanslardan biri Şimali Kiprin sülh və anlaşma tərəfdarı olduğunu nümayiş etdirməsidir. Prezident Erhürman yunan Kiprinə səfər etməklə bunu göstərmiş oldu. İndi qarşı tərəfin adekvat davranışlarını diqqətlə izləmək lazımdır ki, müvafiq nəticələr çıxarmaq mümkün olsun”.