Rusiya Dövlət Dumasının deputatı, Əmək, sosial siyasət və veteranların işləri üzrə komitənin sədri Yaroslav Nilov bildirib ki, ölkədə minimum əmək haqqı 2026-cı ildən təxminən 20% artırıla bilər.

Publika.az xəbər verir ki, Nilov TASS-a açıqlamasında müzakirələrə və prezidentin tapşırığına əsasən belə proqnoz verdiyini qeyd edib.

Onun sözlərinə görə, planlaşdırılan indeksasiya proqnozlaşdırılan inflyasiyanı üstələyəcək və faktiki artım daha yüksək ola bilər. Deputat əlavə edib ki, minimum əmək haqqı təxminən 27 min rubla (təxminən 570 AZN) çatacaq və bu artım 4-5 milyon insanın gəlirlərinə təsir göstərəcək.

Məlumata əsasən, Rusiya hökuməti payız sessiyasında federal büdcə layihəsi ilə birlikdə minimum əmək haqqının indeksasiyası barədə qanun layihəsini təqdim etməyi planlaşdırır.

Hazırda ölkədə minimum əmək haqqı fərdi gəlir vergisi tutulmadan 22.440 rubl (təxminən 475 AZN) təşkil edir.