“Zəngəzur dəhlizi tikildiyi zaman 15 milyon ton yükdaşıma gücü ortaya qoyacağıq. 30 illik proqnozumuza görə, ümumilikdə 147,6 milyard lirə gəlir əldə edəcəyimizi hesablamışıq”.

Publika.az xəbər verir ki, bunu Türkiyənin nəqliyyat və infrastruktur naziri Əbdülqədir Uraloğlu İğdırda jurnalistlərə açıqlamasında deyib.

Zəngəzur dəhlizinin region üçün olduqca önəmli olduğunu bildirən Uraloğlu, bu yolun Orta Dəhlizi də dəstəkləyəcəyini qeyd edib.

Nazir, Orta Dəhliz ilə birlikdə dəmir yolu vasitəsilə aparılacaq ticarətin, dəniz yoluna görə ciddi vaxt qənaəti təmin edəcəyini vurğulayıb:

“Nəticədə hər cür alternativinizin olması lazımdır. Biz də bu dəmiryolunu tikib bitirdiyimiz zaman müəyyən müddət ərzində buraya etdiyimiz sərmayə geri qayıdacaq. Bunu yalnız nəqliyyat imkanları olaraq düşünmürük, eyni zamanda strateji bir sərmayə olaraq da görürük”.

"30 illik proqnoza görə, Zəngəzur dəhlizindən əldə ediləcək əməliyyat gəlirləri 135 milyard lirə, qəzaların azaldılmasından 3 milyard lirə, iqlim faydalarından 2,1 milyard lirə, vaxta qənaətdən 3,5 milyard lirə və yol baxımından 4 milyard lirə olacaq. Ümumilikdə, 147,6 milyard lirədən çox qazancımız olacaq", - Uraloğlu açıqlayıb.

O, həmçinin əlavə edib ki, Zəngəzur dəhlizi Türkiyəni türk dövlətləri və Uzaq Şərqlə birləşdirən ən qısa marşruta çevriləcək.