Koreya Xalq Demokratik Respublikası (KXDR), Prezident Li Çje Myonun zahirən barışdırıcı addımlarına baxmayaraq, Cənubi Koreya ilə danışıqlara getməkdən imtina edib.

Teleqraf xəbər verir ki, bu barədə KXDR rəhbəri Kim Çen Inın bacısı, Koreya Fəhlə Partiyası Mərkəzi Komitəsinin şöbə müdirinin müavini Kim Yo Conq bildirib.

O qeyd edib ki, Seulun yeni hakimiyyəti qonşu ölkəyə qarşı təbliğat yayımını və vərəqələr atmağı dayandırıb, həmçinin barışıq və yardım zərurətini bəyan edib.

Bununla belə, Kim Yo Conqun fikrincə, indiki sülhsevər bəyanatlar Cənubi Koreyanın mahiyyətini və KXDR-i udmaq yolu ilə birləşmək niyyətlərini dəyişməyib.

"Əslində, onun ABŞ ilə ittifaqa olan kor inamı və qarşıdurma siyasəti sələfinin siyasətindən heç nə ilə fərqlənmir. Seulun təklifləri Pxenyanı maraqlandırmır, danışıqlar aparmaq üçün heç nə yoxdur, bu, KXDR-in rəsmi mövqeyidir ", - Kim Çen Inın bacısı əlavə edib.