Rusiya mətbuatında İstanbuldakı diplomatik mənbəyə istinadla yayılan məlumatlar müzakirələrə səbəb olub. İddialara görə, Moskva və Kiyev arasında pərdəarxası danışıqlar aparılır.

Hətta iki ölkənin nümayəndə heyətinin yeni rəsmi görüş yerini müzakirə etdikləri bildirilir. Xüsusilə mayın 16-da İstanbulda Rusiya və Ukrayna nümayəndələri arasında 2022-ci ildən bəri ilk dəfə danışıqların baş tutması fonunda bu məlumat maraqla qarşılanıb.

Globalinfo.az-a danışan siyasi şərhçi Əli Zülfüqaroğlu deyib ki, Rusiya hazırda Ukrayna ərazilərini işğal altında saxlamağa və Kiyevi ərazi güzəştlərinə məcbur etməyə çalışır:

“ABŞ administrasiyası üçün isə prioritet Çinlə ticari savaş və bu istiqamətdə Vaşinqtonun maraqlarına cavab verən zəminin formalaşdırılmasıdır. Eyni zamanda, Rusiyanın Ukrayna və Avropa İttifaqı üçün (Aİ) təhdid faktoru kimi qalması ABŞ Prezidenti Donald Trampın maraqlarına cavab verir. Çünki Tramp, Avropa İttifaqına təzyiq göstərməklə onun ABŞ-ın vassalı olaraq saxlanılmasını istəyir.

Paralel olaraq isə Rusiya ilə münasibətləri normallaşdırmaq istiqamətində siyasət yürüdür və çalışır ki, Moskva Vaşinqtonun Pekinlə apardığı ticarət müharibəsində qarşı tərəfdə yer almasın”.

Ekspertin sözlərinə görə, Ağ Ev Ukrayna ilə bağlı prosesdə artıq öz maraqlarını təmin edib:

“Rusiya isə qalıcı atəşkəsə nail olmaq, Ukraynanın silahlandırılmasını dayandırmaq və onu ərazi güzəştlərinə getməyə məcbur etmək kimi maksimalist mövqe sərgiləyir. Bu yanaşma vəziyyəti daha da gərginləşdirir, lakin mövcud reallıqlar fonunda Ukraynanın müəyyən ərazilərdən imtina etməsi və Rusiyanın bu ərazilərdəki nəzarətinin de-fakto tanınması ehtimalı yüksəkdir.

Hesab edirəm ki, reallıq belədir və bu mənzərənin dəyişməsi mövcud geosiyasi proseslər fonunda mümkün deyil”.