Ötən gün Kremlin mətbuat katibi Dmitri Peskov jurnalistlərə açıqlamasında Rusiya ilə Azərbaycan arasında mövcud gərginliyə münasibət bildirib. Peskov Moskvanın Bakı ilə problemlərin həllinə ümid etdiyini vurğulayıb.

Kreml sözçüsünün açıqlamasında Azərbaycanda yaşayan rusların xüsusi qeyd edilməsi isə diqqət çəkib. Peskov Azərbaycanda ruslara hörmət edilməsinin Moskva üçün vacib olduğunu söyləyib. Maraqlıdır ki, Rusiyanın daha əvvəl də gərginlik yaşadığı ölklərə qarşı apardığı kampaniyalarda əsas iki məsələ üzərindən vurğu edilirdi: rus dili və həmin ölkələrdə yaşayan ruslar. Analitiklərin fikrincə, Moskva bundan mövqeyinin uzlaşmadığı ölklərə qarşı bir növ silah kimi istifadə edir.

Bakının təyyarə qəzası ilə bağlı beynəlxalq məhkəməyə müraciət etmək üçün sənədləri toplaması, MDB iclasına qatılmaması, bir sözlə, Moskva ilə soyuyan münasibətlər fonunda Peskovun açıqlaması necə dəyərləndirilməlidir?

Globalinfo.az-a danışan siyasi şərhçi Elmir Səftərov deyib ki, III Şuşa Qlobal Media Forumunda jurnalistlərin suallarını cavablandıran Prezident İlham Əliyev AZAL şirkətinə məxsus təyyarənin vurulması fonunda Azərbaycan ilə Rusiya arasındakı münasibətlərin hazırkı vəziyyəti ilə bağlı mühüm fikirlər səsləndirdi:

“Görünən odur ki, 2022-ci il fevralın 22-də Moskvada imzalanan müqaviləyə baxmayaraq, Rusiya səmimi yanaşma və münasibət göstərməkdən uzaq davranışlar sərgiləyir. Bu isə “Müttəfiqlik qarşılıqlı fəaliyyəti haqqında Bəyannamə”nin və strateji tərəfdaşlıq münasibətlərinin ruhuna tamamilə ziddir.

Ona görə ki, təyyarənin vurulması ilə bağlı Rusiyanın öz günahını etiraf etməməsi və cəzalandırılmaması mənfi presedent yaradır. Təəssüf ki, bu hadisə ilə bağlı qarşı tərəfin səsləndirdiyi təkliflər və irəli sürdüyü versiyalar baş verənlərin üstünün örtülməsinə və həqiqətlərin gizlədilməsinə hesablanıb.

Azərbaycan tərəfi isə vəziyyətlə barışmayaraq beynəlxalq ədliyyə sisteminə müraciət etməyə hazırlaşır ki, bu da tam hüquqi və legitim bir addımdır. Beynəlxalq münasibətlər sistemində qarşılıqlı hörmətə əsaslanan siyasəti ilə tanınan Azərbaycan 7 ay səbrlə cavab gözləsə də, heç bir nəticə əldə olunmadığı üçün və qarşı tərəfin məsuliyyətsiz davranışları səbəbindən bu yola əl atmaq məcburiyyətində qalıb”.

İstənilən halda, bugünkü vəziyyət Azərbaycanın seçdiyi yol deyil və ikitərəfli münasibətlər baxımından heç də ürəkaçan mənzərə kimi xarakterizə oluna bilməz:

“Düşünürəm ki, Rusiya rəsmiləri təyyarəmizin vurulmasının əsl səbəblərini ört-basdır etmək və münasibətləri süni şəkildə qabartmaq əvəzinə, əsl problemin kökünə enməli və onu həll etməyə çalışmalıdırlar. Yalnız bu halda anlaşılmazlıqlar aradan qalxar və səmimi, faydalı qonşuluq münasibətləri üçün sağlam zəmin formalaşar”.