Prezident İlham Əliyevin III Şuşa Qlobal Media Forumunda ABŞ ilə münasibətlərə dair sözləri xüsusi diqqət çəkir. Dövlət başçısı ABŞ Prezidenti Donald Trampın rəhbərlik etdiyi hökumətin əvvəlkindən fərqləndiyi, hazırkı administrasiya ilə əlaqələrin yaxşı olduğunu bildirib. O, Amerikanın son zamanlarda Cənubi Qafqazda proseslərdə iştirakının göründüyünü, Azərbaycan və Ermənistan arasındakı münaqişənin həllinnə töhfə verməyə çalışdığını söyləyib.

Prezident həmçinin ABŞ şirkətinin Zəngəzur dəhlizini icarəyə götürməsi məsələsinə münasibət bildirib. İlham Əliyev ərazimizdə heç bir operator, heç bir ticarətçi, heç bir icarədarın ola bilməyəcəyini vurğulayıb və bu məsələ ilə bağlı müvafiq sualın Ermənistana ünvanlanmalı olduğunu deyib.

Bu, Vaşinqtonun iştirakı Bakı ilə İrəvan arasındakı sülh prosesini sürətləndirə bilərmi? Dövlət başçısının ABŞ-ın Zəngəzur dəhlizini icarəyə götürməsi, yaxud xarici şirkətin nəzarəti məsələsi ilə bağlı sözləri Ağ Ev və İrəvana bir mesajdırmı?

Globalinfo.az-a danışan Bakı Politoloqlar Klubunun sədri Zaur Məmmədov deyib ki, Azərbaycan Prezidenti amerikalı həmkarı Donald Trampın prezident seçkilərində qələbəsinə sevinən ilk liderlərdən biri idi:

“Bununla bağlı hələ seçkilərə bir neçə ay qalmış açıq şəkildə mövqeyini bildirərək Trampın qalib gəlməsini arzuladığını qeyd etmişdi. Bu, Azərbaycan üçün o demək idi ki, ölkə seçkilərin nəticələrini və bu prosesdən sonra ABŞ-Azərbaycan münasibətlərini nəzərə alır. Respublikaçılar Partiyasının bu mövqeyi anlaması müsbət bir addım oldu. Onlar başa düşürlər ki, Azərbaycan ayrıcı deyil, birləşdirici bir qüvvə kimi çıxış edir. Bu, çox yaxşı haldır.

Hazırda istər iqtisadi, istər siyasi, istərsə də nəqliyyat və kommunikasiya məsələlərində Əliyevin rəhbərliyi altında, coğrafi cəhətdən kiçik bir dövlət qlobal səviyyədə böyük işlərlə məşğul olur. Həmçinin, nə yaxşı ki, bu yanaşma rəsmi London, Vaşinqton və Qərbin bəzi dairələrində də düzgün qiymətləndirilir. Baxmayaraq ki, ABŞ-da, Qərbdə Azərbaycanı istəməyən böyük bir qüvvə və şəbəkə mövcuddur. Onlar Vaşinqton-Bakı münasibətlərinin inkişaf etməsindən ciddi narahatdırlar”.

Politoloq qeyd edib ki, Zəngəzur dəhlizi yaxın zamanda açılacaq:

“Bu barədə dövlət başçısı çıxışlarında dəfələrlə bəyan edib. Hansı kampaniya, şirkət və ya ölkənin maraqları olmasından asılı olmayaraq, bu yol açılacaq və strateji əlaqələr inkişaf edəcək. Bunlar yalnız Ermənistanın yurisdiksiyasına aid məsələlərdir və qərarı baş nazir Nikol Paşinyan verməlidir. Azərbaycan ərazisində təbii ki, heç bir üçüncü qüvvə nə ölkə, nə də şirkət statusunda olmamalıdır. Azərbaycan bir suveren və müstəqil dövlət kimi bütün məsələlərlə özü məşğul olacaq. Son baş verən danışıqlar bir daha göstərir ki, rəsmi Bakının mövqeyi möhkəmdir və bu rol həm də Ağ Evdə qəbul edilib. Təsadüfi deyil ki, danışıqlar Vaşinqton tərəfindən də Azərbaycanın istəkləri nəzərə alınaraq, məhz bizim tələblərimiz altında həyata keçirilib”.