Moskva Ermənistanda Rusiya mediasına qarşı hərəkətlərə görə İrəvana qarşı sanksiyaların tətbiqinə hazırlaşır.

Publika.az xəbər verir ki, bu barədə Ermənistanın “Hraparak” nəşri diplomatik mənbələrə istinadən məlumat yayıb.

Nəşrin məlumatına görə, Rusiya xarici işlər nazirinin müavini Mixail Qaluzin Ermənistan səfiri Qurgen Arsenyanla görüşdə Moskvanın mövqeyini səsləndirib.

“Onlar birbaşa Arsenyana bildiriblər ki, Ermənistan hakimiyyətinin nə planlaşdırdığını və anti-Rusiya əhval-ruhiyyəsini necə qızışdırdıqlarını bilirlər”, - məlumatda vurğulanır.

Nəşrin həmsöhbətləri onu da bildiriblər ki, Ermənistan hakimiyyətinə çatdırılıb ki, Rusiya dövlət televiziya kanalları Qərb siyasətçilərinin təzyiqi ilə ictimai multipleksdən çıxarılsa, onları “xoşagəlməz sürprizlər” gözləyir. Mümkün tədbirlər arasında iqtisadi sanksiyaların adı çəkilsə də, əlavə məlumat verilməyib.

İyulun 7-də Qaluzin Rusiya Xarici İşlər Nazirliyinin binasında Arsenyanla Ermənistan mətbuatının Rusiya ilə bağlı materiallarını müzakirə edib.

Xarici işlər nazirinin müavini Moskvanın Rusiya və Ermənistanın müvafiq idarələri arasında növbəti məsləhətləşmələrin keçirilməsi təklifini də təsdiqləyib.