Azərbaycanda rusdilli məktəblərin bağlanacağı ilə bağlı iddialar ictimaiyyətdə geniş müzakirələrə səbəb olub. Bildirilir ki, artıq bu barədə məktəblərin vatsap qruplarına bildirişlər gəlib.

Digər tərəfdən, bu gün 2025-2026-cı tədris ilindən etibarən ali təhsil müəssisələrində də oxşar addımın atılacağı haqda xəbərlər yayıldı. Qeyd olunur ki, bütün ixtisaslar üzrə tədris yalnız Azərbaycan və ingilis dillərində aparılacaq. Hətta hazırda rus sektorunda təhsil alan tələbələr avqustun 20-dək Azərbaycan dili üzrə dil imtahanı verməlidirlər.

Bu proses rusdilli şagird və tələbələrin aqibətinə necə təsir göstərəcək?

Globalinfo.az-a danışan təhsil üzrə ekspert Sona Əliyeva sözügedən məlumatların hələ ki, şayiə olduğunu deyib:

“Azərbaycan multikultural dəyərlərə sahib, dil, ədəbiyyat və təhsil kimi ümumbəşəri dəyərləri siyasiləşdirməyən nadir ölkələrdən biridir. Ölkəmizdə hər zaman rus dilinə rəğbət olub. Bunu gündəlik həyatda da hiss edirik. Kafe, restoranlarda, mağazalarda və sair hələ də rus dilində danışmaq “dəbdə”dir. Dünyada ən çox istifadə olunan dillərdən biri də rus dilidir. Amma dövlət məktəblərinin bağlanmasında bir qəbahət görmürəm. Dil öyrənmək istəyənlər üçün hər cür imkan və vasitə mövcuddur. Texnologiyanın hazırkı inkişafını da nəzərə alsaq, kifayət qədər ucuz və əlçatan vasitələr var”.

Sona Əliyeva bildirib ki, ayrıca özəl rus məktəbləri yaradıla bilər:

“Bu, bir alternativdir. Vətəndaşlarımızın, milliyyətindən asılı olmayaraq burada yaşayan hər kəsin ana dilimizi mükəmməl bilməsi üçün Azərbaycan dilində təhsil alması vacibdir. Lakin rus sektorunda təhsil alan tələbələrin Azərbaycan dilindən imtahan verməsi ədalətsiz qərardır. Baş verən proseslərdə onların heç bir günahı yoxdur. Tələbələr üçün müddətin bir qədər uzadılması məqsədəuyğundur. Əks halda, onlar üçün çətinlik yaranacaq”.