“Müqəddəs Mübarizə” Hərəkatının liderləri və tərəfdarları tərəfindən terrorizm və hakimiyyətin qəsb edilməsinə hazırlıq işi üzrə başlanmış cinayət işi çərçivəsində Ermənistan İstintaq Komitəsi, Milli Təhlükəsizlik Xidməti və Daxili İşlər Nazirliyi 90-dan çox ünvanda axtarış aparıb.

Globalinfo.az Teleqraf-a istinadən xəbər verir ki, axtarışlar zamanı ittihamları təsdiqləyən sənədlərlə yanaşı, odlu silahlar və döyüş sursatları, tədbirlər planı, işə götürülən şəxslərin siyahıları, hərbi texnikalar, radiorabitə vasitələri, PUA-lar, hakimiyyətin zorla ələ keçirilməsindən sonra dəstənin həyata keçirəcəyi əməllərin müfəssəl planlaşdırılması, ardıcıllığı, xronologiyası və digər vasitələr tapılıb.

Müstəntiqin vəsatəti əsasında 16 nəfər barəsində cinayət işinin açılması barədə qərar qəbul olunub.

Hazırda müstəntiqin qərarı ilə 14 nəfər saxlanılıb.

Ermənistan İstintaq Komitəsi cinayət prosesinin sonrakı gedişi ilə bağlı əlavə məlumat verəcək.

İstintaq davam edir.

***10:29

Ermənistanda terror və hakimiyyətin ələ keçirilməsi cəhdinin qarşısı alınıb.

Globalinfo.az xəbər verir ki, bu barədə Ermənistan İstintaq Komitəsi məlumat yayıb.

“Arxiyepiskop Baqrat Qalstanyanın lideri olduğu “Müqəddəs mübarizə” adlı hərəkatın iştirakçıları və liderləri Ermənistanda terror aktları və hakimiyyəti ələ keçirməyə yönəlmiş aksiyalar həyata keçirməyi planlaşdırıblar. Hadisə ilə bağlı başlanmış cinayət işi çərçivəsində təxirəsalınmaz istintaq və digər prosessual hərəkətlər davam etdirilir”, – deyə bildirilib.

Ermənistanın Baş naziri Nikol Paşinyan da sözügedən məsələ ilə bağlı açıqlama verib.

“Hüquq-mühafizə orqanlarının əməkdaşları “kriminal oliqarx ruhanilərin” Ermənistanda sabitliyi pozmaq və hakimiyyəti ələ keçirmək üçün həyata keçirdiyi irimiqyaslı və bədnam planın qarşısını aldılar”, – deyə o bildirib.

Məlumata görə, hazırda təhlükəsizlik qüvvələri Baqrat Qalstanyanın evində axtarış aparır.

O və tərəfdarları hakimiyyəti ələ keçirmək məqsədi ilə terror aktları hazırlamaqda ittiham olunur.