ABŞ-ın İranın nüvə obyektlərinə aviazərbələr endirməsi bölgədə gərginliyi daha da artırıb. İran tərəfi isə buna cavab olaraq Hörmüz boğazını bağlamaqla hədələyir. Ekspertlər bu ssenarinin reallaşacağı təqdirdə qlobal enerji bazarında misli görünməmiş böhran yaşanacağını bildirirlər.

Publika.az “Haber7”-ə istinadla xəbər verir ki, həftə sonu ABŞ-ın İranın nüvə obyektlərinə hücumundan sonra diqqət neft qiymətlərinə yönəlib.

Bazar ertəsi günün ilk saatlarında Brent markalı neftin qiyməti 80,34 dollara yüksəlib. Bununla da 21 yanvardan bəri ilk dəfədir ki, qiymət 80 dollar həddini aşır. Qiymətlərdəki artım günlük 2,5 faizə yaxınlaşıb. Hazırda 79 dollar civarında stabilləşməkdədir.

İran ABŞ-ın hücumlarına cavab olaraq Hörmüz boğazının bağlanmasını təsdiqləyib. Lakin son qərarı İranın Ali Milli Təhlükəsizlik Şurası verməlidir.

İran həm əsas neft istehsalçısıdır, həm də dünya neftinin təxminən 20 faizinin keçdiyi Hörmüz boğazını nəzarətdə saxlayır. Analitiklər bildirir ki, boğazın bağlanması gündəlik 18 milyon barel neftin bazardan çıxması deməkdir. Bu isə dünya üzrə ümumi təklifin 20 faizə qədər azalması ilə nəticələnə bilər.

“Goldman Sachs” analitikləri xəbərdarlıq ediblər ki, əgər Hörmüz Boğazı uzun müddətlik bağlanarsa, Brent markalı neftin qiyməti 100 dolları keçə və hətta 110 dollara qədər yüksələ bilər. Həmçinin qeyd edilir ki, İranın ixracatında günlük 1,75 milyon barel azalmanın özü belə, qiymətləri 90 dollara qaldıra bilər.