Prezident İlham Əliyev 5-ci sosial islahat paketi ilə bağlı fərman imzalayıb. Sənədə əsasən, 2025-ci il iyulun 1-dən etibarən ölkədə sosial müavinətlərin, Prezident təqaüdlərinin və fəxri adlara görə təqaüdlərin məbləği artırılacaq.

Bu sosial islahatlar paketi cəmiyyət üçün nə vəd edir?

Globalinfo.az-a danışan deputat Azər Badamov deyib ki, Prezidentin imzaladığı fərman 38 maddəni əhatə edir və 18 müxtəlif sosial istiqaməti özündə birləşdirir:

“Bu addım dövlət başçısının siyasətində sosial yönümlü məsələlərin prioritet olduğunu bir daha göstərir. Son 7 ildə 4 milyon insanın sosial vəziyyətinə müsbət təsir edən və ümumilikdə 7,6 milyard manat maliyyə tutumuna malik 5 sosial paket həyata keçirilib. Bu islahatlar pandemiya və inflyasiya kimi qlobal çağırışların təsirlərini yumşaltmaqla yanaşı, insanların rifah halının yaxşılaşmasına yönəlib”.

Deputat bildirib ki, son imzalanmış sərəncam növbəti sosial paket çərçivəsində həyata keçirilən və həssas sosial qrupları əhatə edən mühüm addımdır:

“Söhbət sosial müdafiəyə ehtiyacı olan təbəqədən, eləcə də xüsusi ad və təltiflərə layiq görülmüş şəxslərin maddi təminatının yaxşılaşdırılmasından gedir. Dövlətin maliyyə imkanları artdıqca, bundan ilk növbədə əhalinin sosial rifahının yüksəldilməsi məqsədilə istifadə olunur. Bu da dövlətin sosial siyasətinin ardıcıl və davamlı olduğunu təsdiqləyir”.

Millət vəkilinin sözlərinə görə, gələcək illərdə sosial rifaha xidmət yüksək səviyyəyə çatacaq:

“İmzalanan fərmanla sosial müavinət və təqaüdlər orta hesabla 20 faiz artırılır. 2018-2025-ci illər ərzində minimum əməkhaqqı 3,1, orta aylıq əməkhaqqı 2, minimum pensiya 3 dəfəyədək, müavinət və təqaüd ödənişləri üçün ayrılan illik vəsait isə 5 dəfə artıb”.