“Ermənistanda Rusiya Prezidenti Vladimir Putinin SSRİ-ni bərpa etmək planı yenidən və daha güclü işə düşüb”.

Globalinfo.az xəbər verir ki, bunu Milli Məclisin keçmiş sədri Rəsul Quliyev deyib.

Onun sözlərinə görə, əvvəllər Robert Köçəryana güvənən Putin, indi Serj Sərkisyanı planına cəlb edib:

“O, Ambarsumyan adlı birini baş nazir etmək istəyir. Ermənistanda seçkilər bir ildən sonra keçiriləcək, Sərkisyanın partiyası isə çox ehtimal parlamentə düşə bilməyəcək. Hələ ki bu adamlar parlamentdədirlər. Onlar Nikol Paşinyanı istefaya göndərmək, yerinə yeni millətçini gətirmək, onun başçılığı altında seçkiləri saxtalaşdırmaq və Paşinyanı həbs etmək istəyirlər. Nikolun ən böyük səhvi bu günə qədər Azərbaycanla müqavilə bağlamaması, Türkiyə ilə sivil əlaqələr qurmamasıdır”.

R.Quliyev Sərkisyanın dayaz adam olduğunu bildirib:

“Putinin onunla birlikdə Paşinyanı yıxmaq şansı yoxdur. Qarabağı tərk edən maksimum 25-30 min erməni ilə hazırkı baş naziri devirmək müşkül məsələdir. Çünki ermənilərin ən azı 80 faizi hökümətin Azərbaycanla münasibətlərini yaxşılaşdırılmasını və Türkiyəyə qarşı genosid siyasətindən əl çəkməsini istəyirlər. Putinin SSRİ-ni bərpa etmək planı fantaziyadır. Belarusdan başqa bu prosesə öz xoşu ilə qoşulmaq istəyən ölkə tapmaq mümkünsüzdür. Lazım gəlsə, bu ölkələr birləşib Putin rejiminə qarşı müharibə aparacaq”.

Sabiq parlament sədri qeyd edib ki, Paşinyan təcili Azərbaycanla müqavilə bağlamaqla Sərkisyanı siyasi arenadan uzaqlaşdıra bilər:

“O, bundan istifadə etməlidir. Ümid edirəm ki, özünü az qala Stalin hesab edən Putinin çürük fantaziyaları iflasa uğrayacaq. Ukraynada müharibəni uduzmaq bu prosesi sürətləndirəcək. Kiyev heç vaxt Moskvanın 2014-cü ildən işğal etdiyi əraziləri onlara verməyəcək. Ukrayananın, o cümlədən keçmiş SSRİ ölkələrinin konstitusiyasında ərazi bütövlüyü əsas şərt kimi yazılıb. Dünyanın heç bir təşkilatı Putinin dəcəl uşaqlar kimi tutduğu əraziləri “Rusiya” olaraq qəbul etməz. 1991-ci ildən dövlətlərin təsdiqlənmiş əraziləri dəyişə bilməz”.