Rusiya-Ukrayna müharibəsinin veteranı, “Aydar” batalyonunun sabiq rota komandiri Yevgeni Dikiy bildirib ki, Rusiyanın Ukraynaya gecə saatlarında həyata keçirdiyi raket və dron hücumu, Ukraynanın düşmən təyyarələrini məhv etməklə nəticələnən uğurlu “Hörümçək toru” əməliyyatına verilmiş cavabdır. Onun sözlərinə görə, bu hücum Moskvanın cavab reaksiyası kimi qiymətləndirilməlidir.

Dikiy eyni zamanda xəbərdarlıq edib ki, Ukrayna Rusiya təbliğatının və ABŞ-ın keçmiş Prezidenti Donald Trampın yaratmağa çalışdığı tələyə düşməməlidir. O qeyd edib ki, Rusiya bu hücumları guya məcburi və müdafiə xarakterli kimi təqdim etməyə çalışsa da, əslində Ukrayna sadəcə sağ qalmağa və özünü müdafiə etməyə çalışır. Onun fikrincə, Rusiyanın bu tip hücumları Ukraynanın sülh təşəbbüslərindən sonra belə həyata keçirməsi Moskvanın məqsədli şəkildə müstəqil Ukraynanı məhv etmək niyyətində olduğunu göstərir.

Globalinfo.az-a danışan politoloq Aytən Qurbanova isə bildirib ki, Rusiyanın gecə saatlarında endirdiyi raket və dron hücumu, Ukraynanın “Hörümçək toru” əməliyyatı çərçivəsində düşmən təyyarələrinin məhv edilməsinə verilmiş taktiki cavab kimi qiymətləndirilə bilər:

“Bu, hər iki tərəfin müharibə meydanında nəzarəti itirməmək və üstünlük qazanmaq üçün intensiv mübarizə apardığının bariz nümunəsidir. İlkin olaraq qeyd edilməlidir ki, Ukraynanın həyata keçirdiyi “Hörümçək toru” əməliyyatı düşmən təyyarələrinin effektiv şəkildə neytrallaşdırılması baxımından mühüm addımdır.

Bu, Ukrayna qüvvələrinin hava hücumlarından müdafiə sahəsində irəliləyiş əldə etdiyini və Rusiyaya qarşı texnoloji-taktiki imkanlarını qismən də olsa artırdığını göstərir”.

Politoloqun sözlərinə görə, Rusiyanın bu hücuma cavabı Ukraynanın müdafiə xəttini zəiflətmək və strateji üstünlüyü yenidən ələ keçirmək məqsədi daşıyır:

“Hücumların məqsədi Ukraynanın hava hücumlarına qarşı müdafiə sistemlərini sarsıtmaq, qarşı tərəfin əməliyyatlarının effektivliyini minimuma endirməkdir.

Nəticə etibarilə, bu hadisə göstərir ki, müharibə hələ uzun müddət aktiv fazada davam edəcək və tərəflər döyüş qabiliyyətlərini itirməmək üçün daim yeni taktikalardan istifadə edəcəklər”.