Kanadanın Manitoba əyalətində geniş miqyaslı meşə yanğınları səbəbilə fövqəladə vəziyyət elan olunub.

Globalinfo.az xəbər verir ki, bu barədə “Bild” nəşri məlumat yayıb.

Havanın 37 dərəcəyə qədər isti olması, torpağın tamamilə quruması və bölgənin preriya ərazilərində ard-arda yanğınların baş verməsi vəziyyəti daha da ağırlaşdırıb.

Manitoba əyalətinin baş naziri Vab Kinyu bu hadisəni “Manitobanın tarixində baş vermiş ən böyük təxliyə əməliyyatı” adlandırıb. Xüsusilə Flin-Flon adlı mədənçi şəhərciyi yanğınlardan ciddi ziyan görüb – sakinlərə evlərini dərhal tərk etmək çağırışı edilib.

Ərazidən çıxış üçün yeganə yol tıxac səbəbindən bağlanıb, yanacaqdoldurma məntəqələrində isə benzin qurtarıb. Bu səbəbdən əhali hərbi təyyarələrlə təxliyə edilir. İndiyədək 17 mindən çox insan təxliyə olunub.

Təbii fəlakətin gücü o qədər yüksəkdir ki, yanğın ocaqlarına yaxınlaşmaq belə mümkün deyil. Cəmi bir neçə gün ərzində Manitoba ərazisində 200 min hektardan çox meşə sahəsi yanıb – bu, son 5 ilin orta göstəricisindən 3 dəfə çoxdur.

“İlk dəfədir ki, eyni vaxtda bütün bölgələrdə yanğınlar müşahidə olunur, təkcə bir hissədə yox,” – deyə baş nazir Kinyu xəbərdarlıq edib.
Onun sözlərinə görə, bu, iqlim dəyişikliyinin birbaşa nəticəsidir və ölkə buna təcili uyğunlaşmağa məcbur olacaq.