Azərbaycanla Fransa arasında mövcud gərginliyin əsas səbəblərindən biri Fransanın uzun illər ərzində Ermənistana heç bir şərt və ya balanslı siyasət olmadan göstərdiyi ardıcıl dəstəkdir.

Bu sözləri Teleqraf-ın Avropa bürosuna açıqlamasında Fransa parlamentinin keçmiş üzvü, Fransa-Azərbaycan Dostları Assosiasiyasının sədri Jerom Lamber bildirib.

O, Fransa və Azərbaycan arasındakı mövcud diplomatik münasibətlərin aşağı səviyyədə olduğunu xatırladıb: "İki ölkə arasında hazırkı münasibətlər kifayət qədər gərgindir. Görünür ki, Azərbaycan Fransa hökuməti tərəfindən hələ də tam şəkildə dəyərləndirilmir. Fransa siyasi baxımdan obyektiv yanaşmadan uzaqdır. Mövcud gərginliyin əsas səbəblərindən biri kimi, Fransanın uzun illər ərzində Ermənistana heç bir şərt və ya balanslı yanaşma olmadan göstərdiyi davamlı dəstək göstərilə bilər. Bu dəstək xüsusilə də Ermənistanın Azərbaycanın ərazilərini uzun müddət qeyri-qanuni işğal altında saxladığı bir dövrdə daha da nəzərəçarpacaq olub. 2020-ci ildə baş verən İkinci Qarabağ müharibəsi nəticəsində Azərbaycanın ərazi bütövlüyünü bərpa etməsi beynəlxalq hüquqa uyğun bir proses olsa da, bəzi Fransa rəsmilərinin bu prosesi qərəzli şəkildə tənqid etməsi ziddiyyətli və paradoksal təsir bağışlamışdı.

Lamber mövcud vəziyyətin Fransadakı erməni əsilli vətəndaşların təşkilatlanmış şəkildə həyata keçirdikləri güclü lobbiçilik fəaliyyətinin nəticəsi olduğunu vurğulayıb: “Həm media, həm də siyasi dairələrdə fəal olan bu qrup üzvləri, çox zaman Fransanın milli maraqlarından daha çox, mənşə ölkələrinin maraqlarını müdafiə edən mövqe sərgiləyirlər. Bu hal, obyektiv və balanslı diplomatik mövqenin formalaşmasına mane olur. Fransada bəzi siyasi və diplomatik təşəbbüslərin irəli sürülməsi isə adıçəkilən qrupların media və siyasi sahədəki təsir imkanları səbəbilə ləngiyir. Obyektiv mövqe tutmaq istəyən jurnalistlər, müstəqil siyasi fiqurlar çox zaman təzyiq və ya reputasiya hücumlarına məruz qalırlar. Bu, demokratik debat mühitinə mənfi təsir göstərir”.

Sabiq deputat son zamanlar liderlər arasında səmimi görüşə və Fransanın Türk dünyasına qarşı fikirlərinə də münasibət bildirib: “Son zamanlar Albaniyanın paytaxtı Tiranada Prezident Emmanuel Makron ilə Prezident İlham Əliyev arasında baş tutan görüşün səmimi şəraitdə keçməsi ümidverici bir jest kimi qiymətləndirilə bilər. Bununla belə, bu görüşlə bağlı Fransa mediasında heç bir əhəmiyyətli məlumatın dərc edilməməsi, münasibətlərin gələcək inkişafı baxımından müəyyən suallar doğurur. Nəhayət, Fransa ictimaiyyətində və siyasi dairələrində “Türk dünyası” anlayışı çox zaman bir təhlükə kimi qavranılır. Bu yanaşma, Türk sivilizasiyasının regional sabitliyə, xüsusilə də Cənub-Şərqi Avropada oynadığı müsbət rolu görməməzliyə vurur və stereotiplərlə zəngin tənqidlərə əsaslanır”.