Kürdüstan Fəhlə Partiyası (PKK) özünü ləğv etdiyi açıqladıqdan sonra diqqətlər terror təşkilatının tərkisilah prosesinə yönəlib. Türkiyənin Milli Kəşfiyyat Xidməti (MİT) prosesin addım-addım izlənildiyini bildirib. Həmçinin Ankaranın bu məsələ ilə bağlı hazırladığı müvafiq planın olduğu, 4 ay ərzində müsbət nəticənin əldə ediləcəyi vurğulanır.

İddialara görə, Ankara “Terrorsuz Türkiyə” hədəfi çərçivəsində tərkisilah prosesinə zərər verə biləcək hər hansı addımın atılmaması üçün İsrail və İrana xəbərdarlıq edib. Hətta kürdlərin proksi qüvvələr kimi Türkiyə sərhədinə gətirilməsinin müharibə aktı olaraq qiymətləndiriləcəyi qeyd olunub.

Globalinfo.az-a danışan siyasi şərhçi Cavanşir Abbaslı deyib ki, qardaş Türkiyənin bu xəbərdarlığı olduqca yerində qərardır:

“Çünki, İsrail və İran kimi ölkələr terror təşkilatının birdəfəlik və heç kəsin gözləmədiyi şəkildə bu cür qısa müddətdə sıradan çıxarılmasına göz yuma bilməzdi. Lakin düşünürəm ki, bu proses nəticə verməyəcək və Türkiyə başladığı işi bitirəcək. Necə ki, PKK-nın əsas dayaqlarından biri olan Suriya məsələsi həll edildi, elə bu da onun təbii davamıdır. Artıq kürdlər də prosesin başlanmasından sonra on illərdir etdikləri səhvlərin fərqinə vardılar və əmin oldular ki, sülh mühitində yaşamaqdan başqa çıxış yolları qalmayıb.

İran və İsrail əvvəlki planlarını həyata keçirməyə cürət etməyəcəklər, çünki Türkiyə dəyişib. Xüsusilə, Suriya prosesindən sonra hər iki dövlət Ankaranın gücünü daha dərindən hiss etdilər. Tehran bu cür addım atmağa risk etməz. Qonşuluğunda güclü bir dövlətlə indiki vəziyyətdə soyuq münasibətlər qurmaq ona zərər vura bilər.

Ekspert əlavə edib ki, artıq ABŞ və bəzi Avropa ölkələri də PKK-nın üzərindəki təsirini azaldıb, kürd terrorçularından istifadə etmək marağında deyillər:

“PKK-nın “istifadə müddəti” bitib. Qardaş Türkiyə bölgədə kürdlərdən proksi qüvvə kimi istifadə olunmasının fərqindədir və bu səbəbdən belə xəbərdarlıqlar edir. PKK artıq tarixdir və tarix səhifələrində hər zaman lənətlənəcək bir fenomen olaraq qalacaq. Əminəm ki, proseslər sonda hamımız üçün sevindirici nəticə ilə yekunlaşacaq.

Artıq hər bir dövlət, xüsusən NATO-nun ikinci ən böyük ordusuna malik olan Türkiyə ilə qarşıdurma axtarmaqdan çəkinir. İsrail və İranın bu istiqamətdə konkret addımlar atacağını da düşünmürəm. Türkiyə tərəfindən verilən belə bir açıqlama, əsasız deyil. Başqa ölkələrin də adı çəkilə bilərdi, amma məhz İsrail və İranın vurğulanması onu göstərir ki, hələ də bu iki ölkə “xəstə düşüncələr”ə qapılmağa davam edirlər”.