Bakıda ötən həftə yağan güclü yağışların səs-sədası kəsilməyib. Bu istiqamətdə müxtəlif fikirlər irəli sürülür, paralel olaraq, bir sıra qurumlar kəskin tənqid edilir. Lakin hansı dövlət orqanının məsul olması sual altındadır. Gah Bakı Şəhər İcra Hakimiyyətinin (BŞİH), gah Azərbaycan Avtomobil Yolları Dövlət Agentliyinin (AAYDA), ya da Nazirlər Kabinetinin (NK) adı çəkilir, həmin qurumların rəhbərləri günahlandırılır.

Əslində məsul şəxs və ya qurum hansıdır?

Globalinfo.az-a danışan nəqaliyyat məsələləri üzrə ekspert İlqar Hüseynli deyib ki, bu məsələdə konkret ad çəkmək doğru deyil:

“Amma Bakı şəhərinin planlaşdırılmasına, salınmasına bilavasitə cavabdeh olan qurum Bakı Şəhər İcra Hakimiyyətidir. Eyni zamanda onun daxilində Nizami, Nəsimi, Yasamal və sair kimi ayrı-ayrı rayonlar, rəhbərlər var. Həmin qurumlar da bilavasitə Bakı Şəhər İcra Hakimiyyətinə şəhərsalma, arxitektura, tikinti məsələləri ilə bağlı hesabat verməlidirlər. Şəhər infastrukturunun qurulması istiqamətində BŞİH-in sifarişləri həyata keçirilir. Amma bunu edən qurum hansıdır? Azərbaycan Yerüstü Nəqliyyat Agentliyi (AYNA) yoxsa AAYDA? Onlar yol infrastrukturu qurularkən hansı mühəndis, texniki sistemlərin yaradılmalı olduğunu, suötürücüləri və sair nəzərə almalıdırlar. Yəni məsuliyyəti daşıyan qurumlar bir deyil, bir neçədir. Fərdlər sabah dəyişəcək, ancaq bütövlükdə qurumların idarəetmə sistemi qalmalıdır. Struktur bu məsələlərə cavabdehdir”.

REAL partiyasının sədri Natiq Cəfərli isə Bakı Şəhər İcra Hakimiyyətinin rəhbəri Eldar Əzizovun son çıxışını xatırladıb.

O bildirib ki, Bakı meri 2 ildən sonra paytaxtın su-kanalizasiya sisteminin düzələcəyini deyib:

“Əzizov 2018-ci ildən Bakı Şəhəri İcra Hakimiyyətinin (BŞİH) başçısıdır, niyə, keçən 7 ildə bu problemi həll etməyib? Bu qurumun su və kanalizasiya sisteminə nə aidiyyəti var? BŞİH-nin səlahiyyətləri məhduddursa, şəhər təsərrüfatı bir mərkəzdən idarə olunmursa, Eldar Əzizov nəyə əsasən, 2 ilə problemi həll edəcəyini söyləyir? Fikrimcə, Bakı şəhəri vahid, seçilmiş mərkəzdən idarə olunmalı, səlahiyyət və məsuliyyət bir mərkəzdə toplanmalıdır”.