Afrika qitəsində yerləşən Somalilənd muxtar bölgəsinin rəhbərliyi ABŞ-dan dövlət kimi tanınmağı istəyib. Bunun qarşılığında Vaşinqtona Somaliləndin Berbera limanı və aviabazasından icarə əsasında istifadə təklif edilib.

ABŞ Somalilendi dövlət kimi tanıya bilərmi? Bu baş versə hansı nəticələr doğuracaq?

Globalinfo.az-a danışan politoloq Zeynal Əmrəliyev bildirib ki, Somalilend çox mühüm strateji mövqedə yerləşən bir ərazidir:

“Dünyada rəsmi olaraq BMT tərəfindən Somalinin ərazisi kimi tanınsa da, uzun müddətdir ki, bölgədə öz hökuməti fəaliyyət göstərir və Somaliyə qarışmaq istəmir. Güclü strateji mövqedə yerləşir – Ədən körfəzinin cənubundadır. ABŞ-ın burada bazasının yerləşməsi, husilərlə ciddi problem yaşayan rəsmi Vaşinqton üçün mühüm amildir. Yəmənin cənubu Ədən körfəzidir və bu körfəz Somalilənd ilə Yəmənin arasında yerləşir. Belə olan halda ABŞ buradakı limanlar vasitəsilə husilərə qarşı ciddi təzyiq yarada bilər.

Somalilənd əlindəki bu fürsətdən istifadə edərək beynəlxalq birliyin diqqətini çəkməyə və öz müstəqilliyini tanıtmağa çalışır. Somali ilə müqayisədə Somaliləndin ərazisi aqrar məsələlər üçün nisbətən əlverişlidir. Ölkə eyni zamanda bir sıra mineral ehtiyatlarla zəngindir ki, bu da ABŞ-a onu bölgədə əsas müttəfiqə çevirməyə imkan verir”.

Politoloq qeyd edib ki, Vaşinqtonun bölgədəki əsas tərəfdaşlarından olan Efiopiyanın da Somaliləndlə münasibətləri xeyli güclənib:

“Bu ölkə Somalilənddə nümayəndəlik də açıb. Rəsmi olaraq tanınmasa da, nümayəndəlik vasitəsilə fəaliyyətini davam etdirir. Efiopiya bölgəyə sərmayə yatırır və bu isə Somali rəhbərliyinin kəskin etirazına səbəb olur.

Rəsmi Vaşinqton Efiopiya ilə razılaşma əsasında Somalilənddə möhkəmlənə bilər. Bu, gözlənilən faktdır. Eyni zamanda, Ədən körfəzinə nəzarəti də məhz Somalilənd vasitəsilə həyata keçirmək mümkündür. Somalilənd rəhbərliyi bu geosiyasi imkanların fərqindədir və müstəqilliklərini ABŞ vasitəsilə beynəlxalq birliyə qəbul etdirməyə çalışırlar”.