Rusiya Prezidenti Vladimir Putin Qazaxıstana son səfəri yerli və xarici mediada olduqca maraqla qarşılanıb. Belə ki, onun həmkarı Kasım-Jomart Tokayevlə apardığı danışıqların əsas hissəsini neft-qaz məsələləri təşkil edib. Görünür, yüzdən çox tankerin sanksiya siyahısına salınması Rusiya neftinin daşınmasına ciddi zərbə vurub.

Qazaxıstan Putinə yardım edəcəkmi?

Globalinfo.az-a danışan politoloq Zeynal Əmrəliyev deyib ki, Rusiya çox ciddi şəkildə maliyyə çətinliyi çəkir:

“Bir müddət əvvəl Mərkəzi Bankın rəhbərliyi prezident Vladimir Putinə də bu məsələ ilə bağlı müraciət edib demişdi ki, müharibənin genişləndirilməsi Rusiyanın iqtisadi, maliyyə sistemində ciddi böhrana səbəb ola bilər. Artıq böhranın əlamətləri görünür. Buna görə də Kreml alternativ mənbə axtarır. Dövlət büdcəsində neft-qaz sektoru mühüm əhəmiyyət kəsb edir. Qərbin ağır sanksiyaları şəraitində Rusiyanın neft-qaz sektorunda ciddi şəkildə geriləmə var. “Rosneft”ə məxsus olan bir çox müəssisələr fəaliyyətini dayandırmaq məcburiyyətində qalıb. Yaranan problemlərin səbəbi Rusiyanın neft və qazını ənənəvi bazarlara sata bilməməsidir”.

Politoloqun sözlərinə görə, Putin sözügedən problemlərin həlli üçün özünə yaxın bildiyi ölkələrə səfərlər edir:

“Putinin Qazaxıstan səfəri də bu baxımdan önəmlidir. O, Tokayevdən dəstək gözləyir. Əgər Qazaxıstan Prezidenti bu dəstəyi verərsə, Rusiyanın vəziyyətdən çıxmaq ehtimalı var. Qazaxıstanın qaz sektoru güclü şəkildə inkişaf edib. Son zamanlar Tokayev hökuməti təbii qazın ixracatına güclü dəstək verir. Rəsmi Astana alternativ enerji mənbələri barəsində, eləcə də Atom Elektrik Stansiyasının tənzimlənməsi istiqamətində də işlər görür. Tokayev hökuməti neft-qaz sektoruna ciddi dəstək göstərir”.