ABŞ Prezidenti Donald Trampın xüsusi nümayəndəsi Keyt Kelloqun “Tayms” qəzetinə müsahibəsində səsləndirdiyi fikirlər birmənalı qarşılanmayıb. Kelloq Ukraynanın sülh sazişi çərçivəsində İkinci Dünya müharibəsindən sonra Berlin kimi bölünə biləcəyini söyləyib.

Ağ Ev rəsmisi Britaniya və Fransa qoşunlarının Dneprdən qərbdə, Rusiya ordusunun isə işğal olunmuş şərqdə nəzarət zonalarını ələ keçirə biləcəyini söyləyib. Onun sözlərinə görə, həmin mövqelərin arasında Ukrayna qüvvələri və demilitarizasiya zonası olacaq.

Kelloq bildirib ki, bunu İkinci Dünya müharibəsindən sonra Berlinlə baş verənlərə bənzətmək mümkündür. O zaman Rusiya zonası, Fransa zonası, Britaniya zonası, ABŞ zonası var idi. Maraqlıdır ki, ABŞ rəsmisi daha sonra nəşrin onun fikirlərini təhrif etdiyini açıqlayıb.

Ukraynanın parçalanması üçün plan hazırlanır? Kelloqun iddiaları gerçəkləşdirilə bilərmi?

Globalinfo.az-a danışan siyasi şərhçi Kənan Novruzov deyib ki, əslində Kelloq sonradan dediklərini təkzib etdi və düzgün başa düşülmədiyini vurğuladı:

“O, fikrinin mümkün atəşkəsdən sonra əraziyə sülhməramlıların yerləşdirilməsi konteksinə aid olduğunu qeyd etdi. Bu barədə danışmaq üçün hələ tezdir. Atəşkəslə bağlı müzakirələrin getməsinə və ABŞ Prezidenti Donald Trampın bu istiqamətdə nəticə əldə olunmasını deməsinə baxmayaraq, hələ də döyüşlər davam edir. Rusiya və Ukrayna asanlıqla razılığa gələnə oxşamırlar. Üstəlik, Avropanın kəskin mövqeyini də nəzərə almaq lazımdır. Məhz Avropanın dəstəyi ilə müharibə daha da genişlənə bilər. Yəni sülhməramlılar və onların təsir zonası barədə danışmaq hələ tezdir.

İkinci bir tərəfdən, Ukraynanın parçalanması ehtimalı həqiqətən də var. Onsuz da, Ukrayna Krımın ilhaqı ilə bir dəfə parçalanıb. Prosesin davamı mümkündür. Prezidenti Volodimir Zelenski obrazlı dillə desək, Kiyev “yaranın yayılmasının qarşısını almaq üçün” buna razı ola bilər.

Onun müqabilində Vaşinqtonun Kiyevə NATO-ya üzvlük vədi verməsi gözləniləndir. Amma Avropa buna razı olmayacaq. ABŞ-ın Ukraynanın parçalanması ilə bağlı planı Avropanın müqaviməti ilə qarşılaşacaq”.