Gürcüstanın Baş naziri İrakli Kobaxidzenin “İmedi” telekanalına müsahibəsində səsləndirdiyi fikirlər maraqla qarşılanıb. Baş nazir Gürcüstanın Abxaziya və Cənubi Osetiya ilə birləşəcəyini qeyd edib.

Kobaxidzenin fikrincə, Gürcüstan “səbir göstərəcək” və öz siyasətində bu səbri rəhbər tutacaq.

Ekspertlər isə belə bir şeyin baş verəcəyi təqdirdə Cənubi Qafqazda separatizmin kökünün tamamilə kəsiləcəyini bildirirlər. Adı çəkilən iki ərazisinin Gürcüstana birləşdirilməsi, artıq regionda Rusiyanın gərginlik toxumlarının tamamilə kökünün kəsilməsi, təsir imkanlarının əlindən alınması kimi dəyərləndirilir.

Cənubi Qafqaz separatizmdən birdəfəlik azad ola bilərmi? Gürcüstanın Abxaziya və Cənubi Osetiya ilə birləşməsi nə dərəcədə mümkün görünür?

Globalinfo.az-a danışan siyasi şərhçi Kənan Novruzov deyib ki, Kobaxidzenin bu açıqlaması Gürcüstanın daxilən “qaynadığı” bir zamanda xalqa və beynəlxalq ictimaiyyətə yönəlmiş mesaj kimi də qiymətləndirilə bilər:

“Bəlkə də, baş nazir bu açıqlaması ilə “suları durultmağa” və tərəfdarlarının qətiyyətinin azalmamasına çalışır. Amma ikinci ehtimal da mümkündür, Gürcüstan separatizmə son qoymaq üçün hərəkətə keçə bilər. Qonşusu Azərbaycanın separatizmə son qoyması onun üçün həm ilham mənbəyi, həm də nümunədir.

Həmçinin Tbilisi hökuməti Rusiyanın Ukrayna ilə müharibədə zəifləməsindən istifadə edir.

Kollektiv Qərb Şərqi Avropadakı müharibənin bitməsini və Moskvanın bu savaşdan qalib çıxmasını istəmir. Çünki elə olan halda Avropa üçün təhdid aktuallaşacaq.

ABŞ isə atəşkəsə nail olmaqda israrlıdır. Ola bilsin, Avropa yeni müharibəyə – Gürcüstan vasitəsilə Rusiyanı yeni “bataqlığa” çəkməyə hazırlaşır. Hər halda bunun işartıları görünür. Proseslərin necə inkişaf edəcəyini isə gələcək hadisələr göstərəcək”.