İran ABŞ-ın təhdidlərinə cavab olaraq hava məkanını bağlamaq və ordunu döyüş hazırlığı vəziyyətinə gətirmək barədə qərar verib.

Globalinfo.az xəbər verir ki, bu barədə “Mehr” agentliyi məlumat yayıb.

Məlumata görə, Tehran bu qərarı ABŞ və İsrailin regionda hərbi aktivliyinin artması fonunda qəbul edib.

“Daily Express” qəzeti ABŞ prezidenti Donald Trampın administrasiyasındakı mənbələrə istinadən xəbər verib ki, əgər Tehran nüvə proqramı ilə bağlı Vaşinqtonla razılığa gəlməsə və nüvə silahı üzərində işi dayandırmasa, İran sentyabra qədər mövcud olmayacaq. Nəşrin məlumatına görə, ABŞ Yaxın Şərqdə əlavə bombardmançılar və aviadaşıyıcı qruplar yerləşdirir və Tehranın razılığa gəlməsi üçün vaxt getdikcə daralır.

“Daily Mail” isə yazıb ki, ABŞ və İsrail İranın nüvə proqramından qaynaqlanan təhdidi aradan qaldırmaq üçün ona hərbi zərbə endirə bilər. Qəzet qeyd edir ki, əvvəllər də İranın nüvə obyektlərinə hücum ediləcəyi ilə bağlı bəyanatlar səsləndirilib, lakin bu dəfə ABŞ və İsrailin yalnız təhdidlə kifayətlənməyəcəyinə dair açıq sübutlar var.