ABŞ Prezidenti Donald Tramp növbəti seçkilərdə Barak Obamaya qarşı mübarizə aparmaqdan məmnun olacağını bildirib.

Publika.az xəbər verir ki, ABŞ Prezidenti Donald Tramp Ağ Evdə jurnalistlərlə söhbəti zamanı bu barədə də danışıb.

O, seçkilərdə namizədliyini irəli sürmək barədə hələ ciddi düşünmədiyini vurğulayıb: "Mən bu məsələni heç vaxt araşdırmamışam. Deyirlər, bunun bir yolu var, amma mənim xəbərim yoxdur".

Jurnalistlər ondan əgər Demokratların namizədi Obama olsa, özünü necə hiss edəcəyini soruşduqda, Tramp "Çox istərdim. Yaxşı olardı", - cavabını verib.

Xatırladaq ki, Obama 4 noyabr 2008-ci ildə keçirilən prezidentlik seçkilərində ABŞ-ın 44-cü dövlət başçısı seçilib və 20 yanvar 2009-cu ildə bu postu Corc Buşdan təhvil alıb. 6 noyabr 2012-ci ildə bir daha prezident seçkilərinə qatılan Barak Obama ikinci dəfə Amerika Birləşmiş Ştatlarına prezident seçilib və 2017-ci ilə kimi bu vəzifəni icra edib.