Qaqauziyanın başçısı Yevgeniya Qutsul ABŞ prezidenti Donald Trampdan Moldovada mümkün vətəndaş qarşıdurmasının qarşısını almağı xahiş edib.

Publika.az xəbər verir ki, bu barədə "RİA Novosti" onun vəkilləri vasitəsilə verdiyi açıqlamaya istinadən məlumat yayıb.

"Mən fövqəldövlətin lideri kimi ABŞ prezidentindən mənəvi və siyasi dəstək istəyirəm. Sizin rəhbərliyiniz vəziyyətin yeni vətəndaş münaqişəsinə çevrilməsinin qarşısını almağa və Fəaliyyət və Həmrəylik Partiyası rejiminin yaratdığı eskalasiyaya son qoymağa kömək edə bilər", - o qeyd edib.

Qutsul martın 25-də axşam saatlarında Kişinyov hava limanında Moldovanı tərk etməyə cəhd edərkən saxlanılıb. Siyasətçinin pasportu götürülüb, onun üzərində tam axtarış aparılıb və ölkədən kənara uçmasına icazə verilməyib. O, seçki fondlarının və bəyannamələrin saxtalaşdırılmasında, qanunsuz maliyyələşmədə şübhəli bilinir. Qutsul iddiaları inkar edir.

Martın 28-də Kişinyov məhkəməsi Qaqauziyanın rəhbərini 20 sutka həbs edib.