“Agence France-Presse”nin (AFP) məlumatına görə, Avropa ölkələri icbari hərbi xidmətin bərpası imkanlarını müzakirə edir. Hərbi ekspertlər vurğulayırlar ki, Avropa İttifaqı (Aİ) ölkələrinin ABŞ-ın azalan dəstəyi kontekstində Rusiyaya qarşı effektiv mübarizə apara bilməsi üçün onlara 300 minə qədər yeni hərbçi lazım ola bilər.

Globalinfo.az-a danışan politoloq Rəşad Bayramov deyib ki, uzun bir dövr ərzində öz təhlükəsizliklərini faktiki olaraq ABŞ-a həvalə edən Avropa indi Trampın atdığı addımlar və qəbul etdiyi qərarlarla çıxılmaz vəziyyətlə üzləşib:

“Ağ Evin Avropa ölkələrinə qarşı artan təzyiqi, NATO-nun özünün mövcudluğunu davam etdirib-etdirməyəcəyi ilə bağlı narahatlıq fonunda Avropanın öz təhlükəsizliyini təmin etmək istiqamətində konkret addımlar atması zəruridir. Buraya Avropanın Ukraynanın da təhlükəsizliyini təmin etmək üçün Ukrayna ərazisinə qoşun göndərmək niyyətlərini də əlavə etdikdə, hərbi və müdafiə sahəsində müvafiq islahatların aparılmasının zəruriliyi qaçılmaz olur. Bu islahatlar təbii olaraq özündə həm ABŞ-dan müstəqil kəşfiyyat sisteminin qurulmasını, yeni silah və texnika alışlarını, həm də hərbi personalın, əsgər sayının artmasını ehtiva etməlidir. Lakin problem ondadır ki, Avropa ölkələrində icbari hərbi xidmətin bərpası məsələsinə baxışlar fərqlidir. Məsələn, Fransada respondentlərin 68 faizi, Almaniyada 58 faizi icbari hərbi xidməti dəstəklədikləri halda İspaniyada əksəriyyət bunun əleyhinədir.

Böyük Britaniya və İtaliyada icbari hərbi xidmət əleyhdarları və tərəfdarları demək olar ki, yarıya bölünüb. Xorvatiya artıq bu ilin yanvarın 1-dən icbari hərbi xidməti bərpa edib. Danimarka, Estoniya, Finlandiya, Litva, Moldova və Norveçdə onsuz da hərbi xidmət icbari qaydada həyata keçirilir.

Yəni başqa sözlə desək, bu məsələyə dövlətlərin münasibəti fərqli olduğu üçün vahid qərarın qəbul olunması sual altındadır. Düşünürəm ki, indiki mərhələdə dövlətlər bu istiqamətdə qərarı ayrı-ayrılıqda öz maraqlarına uyğun olaraq qəbul edəcəklər. O ölkələrdə ki icbari hərbi xidmətin bərpasına əhalinin etirazı olmayacaq və bu, hakimiyyətin reytinqinə mənfi təsir etməyəcək, onlar bu şəkildə qərarı qəbul edə bilərlər. Digərləri isə bundan imtina edərək gözləmə mövqeyində qalacaqlar. Vahid qərarın qəbulu ancaq real təhlükə halında mümkün ola bilər. Başqa sözlə, Rusiyadan hər hansı təhlükə olarsa və ya hökumətlər öz vətəndaşlarını buna inandıra bilərsə, o zaman Avropa ölkələri yekdilliklə icbari hərbi xidmətin bərpası haqqında qərar qəbul edə bilərlər”.